ગરુડ અને કદ્રુની વાર્તામાંથી મળતો બોધ:આપણે બીજાની ધન-સંપત્તિ અથવા અન્ય કોઈપણ વસ્તુનો અંગત ઉપયોગ ન કરવો જોઈએ

ગરુડ દેવ ભગવાન વિષ્ણુનું વાહન છે. ગરુડ વિનતા અને કશ્યપ ઋષિના પુત્ર છે. કદ્રુ ઋષિ કશ્યપની બીજી પત્ની હતી. કદ્રુ અને વિનતા બહેનો હતી, પરંતુ બંને વચ્ચે પરસ્પર પ્રેમ નહોતો. કદ્રુને વિનતાની ઈર્ષ્યા થતી હતી. વિનતા ભગવાન વિષ્ણુની મહાન ભક્ત હતી અને તેનું મન ધાર્મિક કાર્યમાં વ્યસ્ત રહેતું હતું.

એક દિવસ કદ્રુએ કપટતાથી વિનતાને શરતમાં પરાસ્ત કરી તેને પોતાની ગુલામ બનાવી દીધી, જ્યારે ગરુડનો જન્મ થયો ત્યારે વિનતાની જેમ, તેણે પણ કદ્રુ અને તેના સાપ વંશની ગુલામી કરવી પડી હતી.

એક દિવસ ગરુડે સાવકી માતા કદ્રુને પૂછ્યું કે અમે તમારી ગુલામીમાંથી કેવી રીતે આઝાદી મેળવી શકીએ?

ગરુડની વાત સાંભળીને સાવકી માતા કદ્રુએ કહ્યું કે જો તમે મારા માટે અમૃત લાવો તો હું તમને અને તમારી માતાને ગુલામીમાંથી મુક્ત કરીશ.

આ સાંભળીને ગરુડ અમૃત લેવા સ્વર્ગમાં પહોંચ્યા. સ્વર્ગના તમામ દેવતાઓએ ગરુડને રોકવાનો પ્રયાસ કર્યો, પરંતુ ગરુડ કોઈથી રોકાયા નહીં, તેઓ અમૃત કળશ લઈને પૃથ્વી પર આવ્યા.

તે સમયે ભગવાન વિષ્ણુ ગરુડની સામે પ્રગટ થયા. ગરુડે વિષ્ણુ ભગવાનને સમગ્ર વાત જણાવી ત્યારે ભગવાને કહ્યું કે જો તમે આ અમૃત પીશો તો તમે અમર થઈ જશો.

ગરુડે કહ્યું કે આ અમૃત મારી સાવકી માતા કદ્રુનું છે અને હું આ અમૃત તેમની પાસે લઈ જઈ રહ્યો છું. મેં તેમને વચન આપ્યું છે કે હું અમૃત લઈને સીધો તેની પાસે આવીશ. ત્યારબાદ માતા મને ગુલામીમાંથી મુક્ત કરશે. હું કોઈ બીજાના હકની વસ્તુનો અંગત ઉપયોગ કરીશ તો તે અપ્રમાણિકતા થશે.

આ સાંભળીને ભગવાન વિષ્ણુ ગરુડ પર ખૂબ પ્રસન્ન થયા. તેમણે કહ્યું કે હું તમારી ઈમાનદારીથી ખુશ છું. હું તમને વરદાન આપું છું કે તમે ઉચ્ચ પદ પ્રાપ્ત કરશો અને તમે અમૃત પીધા વિના અમર થઈ જશો.

બોધ:-
આ વાર્તાનો સંદેશ એ છે કે આપણે બીજાની ધનસંપત્તિનો અંગત ઉપયોગ ન કરવો જોઈએ. જો આપણે કોઈ વ્યક્તિની સંપત્તિ કે કોઈ વસ્તુ રાખી હોય તો અમાનત છે તેની રક્ષા કરવી જોઈએ.