છઠ્ઠ મહાપર્વ શરૂ:આજે નહાય-ખાય, શનિવારે ખરના; રવિવારે સૂર્યાસ્ત સમયે અને સોમવારે ઉગતા સૂર્યને અર્ઘ્ય આપ્યા પછી છઠ્ઠ પર્વ પૂર્ણ થશે

લોક આસ્થા અને સૂર્યોપાસનાનું મહાપર્વ છઠ્ઠ આજે નહાય-ખાય સાથે શરૂ થઈ જશે. શનિવારે ખરના, રવિવારે સાંધ્યાકાલીન અર્ઘ્ય અને સોમવારે ઉગતા સૂર્યને અર્ઘ્ય આપ્યા પછી વ્રત કરનાર લોકો પારણા કરશે.

શનિવારથી 36 કલાકનો નિર્જળા ઉપવાસ
નહાય-ખાયના દિવસે વ્રત કરનાર લોકો સ્નાન-ધ્યાન પછી ભાત, કોળુંનું શાક, ચણાની દાળ અને આંબળાની ચટણી જેવા ખોરાક ખાઈને પવિત્રતા સાથે આ વ્રતની શરૂઆત કરશે. નહાય-ખાયનો પ્રસાદ મેળવવા માટે વ્રત કરનાર લોકોના ઘરે સોમવારે સામાન્ય શ્રદ્ધાળુઓ પણ પહોંચશે. તે પછી શનિવારે ચોખા, ગોળ અને દૂધથી બનેલી ખીર ખાઈને વ્રતી ખરના કરશે અને તે પછી 36 કલાકનો નિર્જળા ઉપવાસ શરૂ થઈ જશે.

ભગવાન સૂર્યની પૂજા થાય છે
છઠ્ઠ, પ્રકૃતિની પૂજા છે. આ દિવસે સૂર્ય ભગવાનની પૂજા પણ થાય છે. સૂર્યદેવ એકમાત્ર એવા ભગવાન છે જે જોવા મળે છે. અસ્તાચલગામી ભગવાન સૂર્યની પૂજા એ ભાવ સાથે કરવામાં આવે છે કે જે સૂર્યએ આપણાં જીવનને રોશન કર્યું તેના નિસ્તેજ થયા પછી પણ અમે તેમને નમન કરીએ છીએ.

છઠ્ઠ પૂજાના દિવસે નદી, તળાવના કિનારે પૂજા કરવામાં આવે છે. જે સફાઈની પ્રેરણા આપે છે. આ પર્વ નદીઓને પ્રદૂષણ મુક્ત બનાવવાની પ્રેરણા આપે છે. આ પર્વમાં કેળા, સફરજન, શેરડી સહિત અનેક ફળની પ્રસાદ તરીકે પૂજા થાય છે જે વનસ્પતિના મહત્ત્વને દર્શાવે છે.

ભગવાન સૂર્યની મોટી બહેન છઠ્ઠ દેવી
સૂર્ય ઉપાસનાનું આ પર્વ સૂર્ય છઠ્ઠના દિવસે ઊજવવામાં આવે છે, જેથી તેને છઠ્ઠ કહેવામાં આવે છે. આ પર્વ પરિવારમાં સુખ, સમૃદ્ધિ અને મનોવાંછિત ફળ પ્રદાન કરનાર માનવામાં આવે છે. માન્યતા છે કે છઠ્ઠ દેવી ભગવાન સૂર્યની બહેન છે, એટલે લોકો સૂર્યની જેમ અર્ઘ્ય આપે છે અને છઠ્ઠ મૈયાને પ્રસન્ન કરવા માટે સૂર્યની આરાધના કરે છે.

જ્યોતિષમાં સૂર્યને બધા ગ્રહોના અધિપતિ માનવામાં આવે છે. બધા ગ્રહોને પ્રસન્ન કરવાની જગ્યાએ જો માત્ર સૂર્યની આરાધના કરવામાં આવે અને નિયમિત રીતે અર્ઘ્ય આપવામાં આવે તો અનેક લાભ મળી શકે છે.