હોળી સ્પેશિયલ:ભક્ત પ્રહ્લાદ જેવો કુળને પવિત્ર કરનારો પુત્ર જે કુળમાં પેદા થાય છે તેની 21 પેઢીઓનો થાય છે ઉદ્ધાર, પ્રહ્લાદે નવધા ભક્તિ કરી વિષ્ણુને કર્યા પ્રસન્ન

હોળીની પૌરાણિક કથા પ્રમાણે ભક્ત પ્રહ્લાદને મારવા આગથી ક્યારેય ન બળવાનું વરદાન ધરાવતી ફોઈ હોળીકા પ્રહ્લાદને લઈને બળતી આગમાં બેસી ગઈ હતી. પરંતુ વિષ્ણુભક્ત પ્રહ્લાદ નવધા ભક્તિના બળે આગથી બચી જાય છે અને હોળીકા બળીને ભસ્મ થઈ જાય છે આ હતી ભક્ત પ્રહ્લાદની નવધા ભક્તિની શક્તિ. આજે આ પ્રહ્લાદની આ ભક્તિ વિશે અમે તમને જણાવીશું..

પ્રહલાદ હિંદુ ધર્મની પુરાણ કથાઓનું એક પાત્ર છે,જે તેની ભગવાનવિષ્ણુ પ્રત્યેની અદ્વિતિય ભક્તિ માટે પ્રસિદ્ધ છે, શ્રીમદ્ ભાગવત સાતમાં સ્કંધમાં પ્રહલાદ ભક્તનું આખ્યાન આવેલું છે. નારદજી યુધિષ્ઠિરને કહે છે કે હિરણ્યકશ્પુને ચાર પુત્રો હતા. સંહલાદ, હલાદ, અનુહલાદ અને પ્રહલાદ. આ ચાર પુત્રો અને સિહિકા નામની એક પુત્રી હતી (૬-૧૮-૧૩)માં આ નામોનો ઉલ્લેખ છે.

તેમાં પ્રહલાદ સૌથી નાનો છતાં ગુણોમાં સૌથી મોટો હતો. સૌમ્ય સ્વભાવનો હતો. હલાદ એટલે આનંદ, પ્રહ્લાદ એટલે પ્રશિષ્ટ આનંદ પુષ્કળ આનંદ. પ્રહ્લાદ અસુર પુત્ર હોવા છતાય તેનામાં આસુરી સંપત્તિનો લેશમાત્ર અંશ ન હતો. એ સાત્વિક આનંદથી ભર્યો પૂર્યો હતો. એ સર્વગુણ સંપન્ન છતાં નિરાભિમાની પ્રભુનો ભક્ત હતો.

તેના પિતા હિરણ્યકશિપુ તેની ભક્તિનાં તદ્દન વિરોધી હતા. તેને ભગવાન વિષ્ણુ નામ જ પ્રિય ન હતું. તેથી તેણે પ્રહલાદને તેમાંથી મુક્ત કરવા મારવા અનેક ત્રાસ ગુજાર્યા, પર્વત ઉપરથી ફેંક્યો, અંધારી ઓરડીમાં પૂર્યો, હાથીના પગ નીચે કચડાવ્યો, શમ્બાસૂર પાસે અનેક માયાવી પ્રયોગો કરાવ્યાં, વિષનાગથી કરડાવ્યો, સમુદ્રમાં નાખ્યો. આગમાં (હોળીમાં) નાખ્યો પરંતુ પ્રહલાદનો વાળ પણ વાંકો ન થયો. જેનો બચાવનારો હરિ હોય તેને કોણ મારી શકે?

આસૂરી વૃત્તિ નાશ કરવા એ સાત્વિક વૃત્તિને બચાવવા આજે પણ હોળી તહેવારને પ્રેરણા રૂપે સાત્વિક ભાવોના રક્ષણ માટે આને તહેવાર રૂપે ઉજવીએ છીએ.

આયુર્વેદની દ્રષ્ટિએ શિયાળામાં શરીરમાં જામેલા કફને ઓગાળવા તથા કફનો નાશ કરવા માટે હોળી તાપીએ છીએ અને કફ વિરોધી ધાણી, દાળીયા, હળદર, કોપરું વગેરેનો ઉપયોગ કરીએ છીએ.

શ્રવણ કરવું, કિર્તન કરવું, સ્મરણ કરવું, પંડિતો તથા પ્રભુનો સ્પર્શ કરવો અને અર્ચના કરવી, વંદન કરવા દાસપણાનો ભાવ રાખવો, અને આત્મનિવેદન કે સમર્પણ આવી નવધા ભક્તિ પ્રહલાદે આપણને સહુને આપી છે.

પ્રહ્લાદે આપેલાં ભક્તિમય જીવન સૂત્રો

ભક્તિ જનઃ પરમ હંસગતૌ લભેત્ ।

(શ્રીમદ ભાગવત સ્કંધ ૭.૯.૫૦)

આ પ્રમાણેની સ્તુતિથી શ્રીનરસિંહ ભગવાન પ્રસન્ન થઇને બોલ્યા - હે પરમ કલ્યાણ સ્વરૂપ પ્રહ્લાદ તારૃં કલ્યાણ થાઓ હું તારા ઉપર અત્યંત પ્રસન્ન છું. હે ! આયુષ્યમાન, જે મને પ્રસન્ન કરી લેતો નથી તેને મારા દર્શન પ્રાપ્ત થવા અત્યંત મુશ્કેલ છે. પરંતુ જ્યારે મારા દર્શન થઇ જાય છે પછી પ્રાણીના હૃદયમાં કોઈ પણ પ્રકારનો તાપ રહેતો નથી. હું સમસ્ત મનોરથોને પુરા કરનારો છું તેથી જ બધા મને પ્રસન્ન કરવાનો પ્રયત્ન કરે છે.

અસુરકુળનાં ભૂષણ પ્રહ્લાદજી ભગવાનનાં અનેક પ્રલોભનો આપવા છતા તેમણે કંઇ માંગવાની ઇચ્છા કરી નહીં.

છતાય આપ આગ્રહ કરો છો તો મારા ઉપર એવી કૃપા કરો કે ''મારા હૃદયમાં કોઇ ને કોઇ કામનાઓને તેનાં અંકુરને ઉખેડી નાખો અને નિર્મળ કરી નાખો જેથી મને બીજી કોઈ ઇચ્છા ન રહે. હું એટલું જ માગું છું કે તમારો દાસ કોઈપાસે કંઇ માગે નહી. હે નારાયણ ! આપના સિવાય મને કંઇ જોઇતું નથી."