• Gujarati News
  • Dharm darshan
  • Dharm
  • 5 Lakshmi Temples Of South India Are Worshiped With Kubera In Chennai, While In Andhra Pradesh, Goddess Padmavati Is Angry With Lord Vishnu.

દક્ષિણ ભારતના 5 લક્ષ્મી મંદિર:ચેન્નાઈમાં કુબેર સાથે તો આંધ્રપ્રદેશમાં ભગવાન વિષ્ણુથી નિરાશ દેવી પદ્માવતીની પૂજા થાય છે

એક મહિનો પહેલા
  • કૉપી લિંક
  • કાંચીપુરમ અને વેલ્લોરના લક્ષ્મી મંદિરનો વૈભવ સૌથી અલગ, સેંકડો કિલો સોના અને કરોડો રૂપિયાના ઘરેણાં દ્વારા દેવીનો શ્રૃંગાર થાય છે

આજે મહાલક્ષ્મી પર્વ એટલે દિવાળી છે. આ તહેવારમાં દેવી લક્ષ્મીની પૂજા અને દર્શનનું ખાસ મહત્ત્વ ગ્રંથોમાં ઉલ્લેખવામાં આવે છે. એટલે દિવાળીએ દેશભરના લક્ષ્મી મંદિરોમાં ભીડ રહે છે. ભારતમાં દેવી લક્ષ્મીના એવા અનેક મંદિર છે, જેનું પોતાનું ઐતિહાસિક મહત્ત્વ છે. હજારો વર્ષ જૂના મંદિરોથી લઈને નવા મંદિર સુધી દેવી લક્ષ્મીનો વૈભવ જોવા મળી શકે છે.

દક્ષિણ ભારતમાં દેવીના એવા જ ખાસ મંદિર છે, જેમાં કોઈ સ્થાને દેવી લક્ષ્મીની પૂજા કુબેર સાથે થાય છે તો કોઈ સ્થાને આઠ સ્વરૂપોમાં એટલે અષ્ટલક્ષ્મી મંદિર છે. જાણો તમિલનાડુના ચાર અને આંધ્રપ્રદેશના ખાસ મહાલક્ષ્મી મંદિર વિશે..

અહીં કુબેર સાથે દેવી લક્ષ્મી વિરાજે છે- ચૈન્નાઈ (તમિલનાડુ)
હિંદુ ધર્મગ્રંથો અને પુરાણોમાં લક્ષ્મીજીને ધન અને સમૃદ્ધિની અધિષ્ઠાત્રી દેવી માનવામાં આવે છે. ત્યાં જ કુબેરજીને પણ ધન સ્વામી માનવામાં આવે છે. ચેન્નાઈમાં એક એવું મંદિર છે, જ્યાં આ બંનેની પ્રતિમા એકસાથે વિરાજિત છે. કહેવાય છે કે દુનિયામાં આ એકમાત્ર મંદિર છે, જ્યાં આ સ્વરૂપમાં કુબેર લક્ષ્મી સાથે વિરાજે છે.

તમિલનાડુની રાજધાની ચેન્નાઈના શ્રીલક્ષ્મી કુબેર મંદિરમાં દીપોત્સવ માટે દુનિયાભરમાંથી લાખો ભક્ત ભેગા થાય છે. આ મંદિરની ખાસિયત અહીં વિરાજમાન લક્ષ્મી અને કુબેરની કાળા પત્થરથી નિર્મિત પ્રતિમાઓ છે. અહીં કુબેર પોતાની પત્ની સિદ્ધિરાણી સાથે વિરાજિત છે. તેમની પાછળ માતા લક્ષ્મી સ્થાપિત છે જે તેમને આશીર્વાદ આપતા જોવા મળે છે. આ મૂર્તિ પાસે માછલીની બે મૂર્તિઓ રાખવામાં આવી છે અને એવી જ એક માછલી અહીંના મંદિરના ફળિયામાં રાખવામાં આવી છે જેની સાથે એક કાચબો પણ રાખવામાં આવ્યો છે. માન્યતા છે કે કુબેરજીને લીલો રંગ ગમે છે. આ કારણે મંદિરમાં અને તેની આસપાસ લીલા રંગનો પ્રયોગ કરવામાં આવ્યો છે. અહીં ભગવાન ગણેશની પ્રતિમા પણ સ્થાપિત છે. અહીં કુબેર ગજરાજ ઉપર વિરાજમાન છે.

શ્રીહરિથી નિરાશ થઈને અહીં લક્ષ્મીજી પધાર્યા હતાં- તિરૂપતિ (આંધ્રપ્રદેશ)
તિરૂપતિથી લગભગ 5 કિમી દૂર પદ્માવતી દેવી મંદિર છે. તેને અલરમેલમંગપુરમ પણ કહેવામાં આવે છે. અલરનો અર્થ કમળ, મેલનો અર્થ ઉપર, મંગ એટલે દેવી અને પુરમને સ્થાન કહેવામાં આવે છે. પ્રાચીન કથા પ્રમાણે અહીં સ્થિત પદ્મસરોવરથી દેવી મહાલક્ષ્મી એક સોનાના કમળ ઉપર વિરાજમાન થઈને પ્રગટ થયા હતાં. પ્રસિદ્ધ કથા પ્રમાણે મહર્ષિ ભૃગુએ શ્રી વિષ્ણુની છાતિ ઉપર પગ રાખ્યો હતો. જેથી દેવી નિરાશ થયા અને વૈકુંઠ છોડીને પાતાળ લોકમાં જતાં રહ્યા હતાં. તેઓ 12 વર્ષ સુધી આ પુષ્કરિણીમાં રહ્યા અને 13મા વર્ષે કારતક પંચમીએ પદ્માવતી સ્વરૂપમાં પ્રગટ થયાં. અહીં દરરોજ સવારે કલ્યાણોત્સવનું આયોજન થાય છે. જેના પછી ગૃહસ્થ શ્રદ્ધાળુઓ દેવી દર્શન કરી શકે છે.

દેવી લક્ષ્મીની સિંદૂર લગાવીને પૂજા કરવામાં આવે છે- કાંચીપુરમ (તમિલનાડુ)
આ એકમાત્ર એવું મંદિર છ જ્યાં માતા લક્ષ્મીની પૂજા સિંદૂર લગાવીને કરવામાં આવે છે. તેની પાછળ માન્યતા છે કે કોઈ વિવાદના કારણે વિષ્ણુજીએ લક્ષ્મીજીને કુરૂપ થવાનો શ્રાપ આપ્યો હતો. માતા કામાક્ષીની પૂજા કરી તેમને પાપમાંથી મુક્તિ મળી શકી હતી. તે સમયે માતા કામાક્ષીએ કહ્યું હતું કે તેઓ અહીં લક્ષ્મી સાથે વિરાજિત થશે. તેમને ચઢાવવામાં આવતા પ્રસાદથી લક્ષ્મીજીની પૂજા થશે, લક્ષ્મીજીએ અહીં આવનાર લોકોની મનોકામનાઓ પૂર્ણ કરવી પડશે. કામાક્ષીને પ્રસાદમાં સિંદૂર ચઢાવવામાં આવે છે જે લક્ષ્મીજીના ચરણોથી માથા સુધી લગાવવામાં આવે છે.

મંદિરના મુખ્ય પૂજારીના જણાવ્યા પ્રમાણે 1000 કરોડ રૂપિયાથી વધારે કિંમતી ઘરેણાંથી દેવીનો શ્રૃંગાર થાય છે. સાથે જ ઉપયોગમાં આવતી માળાઓ પણ કેસર, બદામ, કાજૂ, કમળ, ચમેલી, ઓર્કિડ, ગુલાબથી બનેલી હોય છે. 15-20 કિલોની આ માળા 5 લાખ રૂપિયામાં તૈયાર થાય છે. મંદિરનો મુખ્ય ગુંબજ 76 કિલો સોનાથી બનેલો છે, જ્યારે નવરાત્રિ અને અનેય અવસરે દેવી જે રથ ઉપર સવાર થાય છે. તે 20 કિલો સોનાથી બનાવવામાં આવે છે. દેવી કામાક્ષીનું આ સ્વરૂપ આઠ વર્ષની કન્યાનું છે.

દેવી લક્ષ્મીનું સોનાનું મંદિર- વેલ્લોર (તમિલનાડુ)
તમિલનાડુના વેલ્લોરમાં સ્થિત શ્રીપુરમ સ્વર્ણ મંદિર દેશના મોટા લક્ષ્મી તીર્થમાંથી એક છે. આ મંદિર અનોખું છે, કેમ કે આ મંદિરને બનાવવામાં લગભગ 15 હજાર કિલો શુદ્ધ સોનાનો ઉપયોગ થયો છે અને તે લગભગ 100 એકરમાં ફેલાયેલું છે. માન્યતા છે કે દુનિયામાં કોઈપણ મંદિરમાં આટલા સોનાનો ઉપયોગ કરવામાં આવ્યો નથી. તેમાં દેવી લક્ષ્મીની મૂર્તિ પણ સંપૂર્ણ રીતે સોનાથી બનેલી છે. આ મંદિર ગોળાકાર છે. મંદિર પરિસરમાં બહાર એક સરોવર છે. જેમાં ભારતની બધી જ મુખ્ય નદીઓનું પાણી લાવવામાં આવ્યું છે. એટલે તેને સર્વતીર્થમ સરોવર કહેવામાં આવે છે. મંદિરની બહાર પરિસરને શ્રીયંત્ર સ્વરૂપે બનાવવામાં આવ્યું છે. જેની વચ્ચે મહાલક્ષ્મી મંદિર છે. મુખ્ય મંદિર સુધી જવા માટે અનેક તોરણદ્વારનો રસ્તો છે. દેવી અભિષેક માટે મંદિર બ્રહ્મમુહૂર્તમાં ખુલે છે અને દર્શન માટે સવારે આઠ વાગ્યા પછી લોકોને પ્રવેશ આપવામાં આવે છે.

એક નહીં, આઠ લક્ષ્મીઓનો નિવાસ- ચેન્નાઈ (તમિલનાડુ)
ચેન્નાઈમાં સમુદ્ર કિનારે આવેલું લક્ષ્મી મંદિર એટલા માટે અનોખું છે કેમ કે અહીં એક નહીં, આઠ લક્ષ્મીઓની પ્રતિમાઓ છે. એટલે તેને અષ્ટલક્ષ્મી મંદિર કહેવામાં આવે છે. આ મંદિરનો મુખ સમુદ્ર તરફ છે કેમ કે પૌરાણિક કથા પ્રમાણે સમુદ્ર મંથન પછી દેવી લક્ષ્મીનો પ્રાદુર્ભાવ સમુદ્ર દ્વારા જ થયો હતો. અષ્ટલક્ષ્મીમા સામેલ છે- આદિ લક્ષ્મી, ધનલક્ષ્મી, ધાન્યલક્ષ્મી, રાજલક્ષ્મી, સંતાનલક્ષ્મી, વીરલક્ષ્મી, વિજયલક્ષ્મી અને વિદ્યાલક્ષ્મી. આ મંદિરના મુખ્ય ગુંબજ ઉપર દેવી-દેવતાઓની મૂર્તિઓ છે. મંદિરમાં અષ્ટલક્ષ્મીની મનભાવન મૂર્તિઓ સાથે વિષ્ણુના દશાવતારના વિગ્રહ પણ છે. મંદિરમાં આઠ મંદિરો પછી એક નવમું મંદિર છે. જેમાં દેવી લક્ષ્મી વિષ્ણુજી સાથે વિરાજિત છે. ખાસ વાત એ છે કે મંદિરનું નિર્માણ ૐના આકારમાં થયું છે. બધી લક્ષ્મી મૂર્તિઓની બનાવટ એકબીજાથી અલગ છે.