તમારા શહેરના લેટેસ્ટ સમાચાર અને ફ્રી ઈ-પેપર મેળવો

Install App

Adsથી પરેશાન છો? Ads વગર સમાચાર વાંચવા ઈન્સ્ટોલ કરો દિવ્ય ભાસ્કર એપ

‘મનાઈ’ અને ‘સખત મનાઈ’ વચ્ચે શું ફરક?

એક વર્ષ પહેલાલેખક: અશોક દવે
  • કૉપી લિંક

* હું આપને એવો કયો પ્રશ્ન પૂછું, જેથી આપ બેહદ ગુસ્સે થાઓ! - બલવંત મગનલાલ ગોટાવાળા, ડાકોર - ગુસ્સો તો મેં પૂરી જિંદગી કોઇની ઉપર કર્યો નથી, સિવાય હકી ઉપર વર્ષે-બે વર્ષે એકવાર. એ ફફડાટ સાથે કે, સામો ગુસ્સો એ તો નહીં કરે ને? * ગુજરાત વિધાનસભાના ધારાસભ્યો તમારા લેખો વાંચે છે? - મોહન એલ. ચતુર્વેદી, ગાંધીનગર - વાંચતા તો હશે... કારણ કે ઘણી વખત એમના ફોન આવે કે, ‘તમારા લેખોમાં હસવાનું ક્યાં ક્યાં છે’, એટલું લેખમાં લાઇન કરીને લખતા હો તો! * વાઇફને સીધી કરવી હોય તો કોઇ ઉપાય છે? - એહસાન ખાન એમ. ધોન્ડી, સુરત - ઉપાય હોત તો આવાં ‘એન્કાઉન્ટરો’ લખવામાં ટાઇમ બગાડત? * ગુજરાતીઓ ફાઇવ-સ્ટારમાં બેઠા હોય કે ક્લબોમાં, વાતો મોટે મોટેથી કેમ કરતા હશે? બીજા ‘ડિસ્ટર્બ’ ન થાય?- બકુલ માટલિયા, સેવિલ-લોંગ આયલેન્ડ, અમેરિકા - એમને તો બેસણાંઓમાંથી ય બહાર કાઢવા જેવા છે. * તમે ઠંડીથી બચવા શું કરો છો? - દીપલ લવજીભાઇ મકવાણા, ડિસા - બંને હાથ ઘસું છું... પોતાના! * તમારા જૂના દોસ્તો જેન્તી જોખમ અને પરવીણ ચડ્ડી શું કરે છે?- ઉપેન્દ્ર વાઘેલા, રાજકોટ - જેન્તીની ટીવી-સિરિયલ બની રહી છે ને પવલો પૂછે રાખે છે, ‘મારી ક્યારે?’ * હવે પેલા વાસ્તુશાસ્ત્રીઓ ક્યાં ગુમ થઇ ગયા? લોકોને ખરા ઉલ્લુ બનાવે રાખ્યા.- મનહરલાલ જીવાભાઇ ચૌધરી, કડી - એમનો ય શું કસૂર? પેટ પૂરતા ડોબાઓ એમને ય મળી રહે છે ને? * સોનિયા કે માયાવતી... સ્ટેજ પરથી માત્ર એક વાક્ય બોલવું હોય એ પણ વાંચીને? - લીલાધર પ્રભુજી સોલંકી, જામનગર - એ કયું વાક્ય બોલે છે, એ સાંભળવાને બદલે શ્રોતાઓને વાંચવા આપવું જોઇએ. * શું તમે ચુસ્ત ભાજપી છો? - વરુણ નાથાલાલ પટેલ, સિદ્ધપુર - હું રાજકારણના કોઇ પક્ષમાં નથી. ભાજપમાં પણ નહીં. યસ, મને ‘મોદીભક્ત’ કહી શકાય. * હેલમેટો પાછી ખેંચાઇ ગઇ! - લબ્ધિ મુકેશ ગોર, સુરત - હવે સાચેસાચ હેલમેટ ‘માથે પડી’ કહેવાય! * શું ચશ્માંવાળી છોકરીને ચશ્માંવાળો છોકરો જ મળે?- પંખુડી જે. પરીખ, સુરત - બંનેનાં ચશ્માં એકસાથે ખોવાઇ જવાં ન જોઇએ! * એકાદ શુક્રવારે કોઇ ગુજરાતી ફિલ્મ વિશે લખીને ગુજરાતી કલાકારોનું ગૌરવ વધારો તો કેવું?- રવીન્દ્ર હાથી, રાજકોટ - મારો હાથ ’50 - ’60ના દાયકાઓની ભંગાર ફિલ્મો માટે લખવા ઉપર બડી મુશ્કેલીથી બેસી ગયો છે. શું કામ મને સુધારવા માગો છો? * શિયાળામાં લગ્ન કરવાથી શૂરાતન બમણું કેમ થઇ જતું હશે?- મહાસુખ દરજી, અમદાવાદ - એકાદવાર શિયાળામાં ય એકાદા લગ્ન કરી જુઓ, પછી ખબર પડે! * ‘સ્ટેચ્યૂ ઓફ લિબર્ટી’ જોવા રવિવારે 15-હજાર લોકો આવ્યા. તેમાં તમે હતા?- રવિ સુવણ, વડોદરા - હું તો ‘સ્ટેચ્યૂ ઓફ પ્યૂબર્ટી’ જોવા ય જઇ શક્યો નથી. * ભારતના સ્ટાર ક્રિકેટરો ટપલાં પડ્યા પછી જ કેમ રમતા હશે?- મનન અંતાણી, રાજકોટ - ભવ્ય વિજયોની પરંપરા સાથે ક્યારેક પરાજય પણ સ્વીકારતા શીખો. * ‘એન્કાઉન્ટર’ ચાલુ કરવાનો વિચાર ક્યાંથી આવ્યો?- કુલદીપ વાજા, ભાવનગર - ‘ઝોમેટો’માંથી. * સરકારી ભરતીઓમાં કૌભાંડો ક્યાં સુધી ચાલુ રહેશે?- વિકી રબારી, બાવરુ - ઓટ આવે ત્યાં સુધી. * તમને નથી લાગતું, પુરુષો કોમળ, નાજુક અને ઋજુ બનવા લાગ્યા છે?- કિશોર મહેતા, રાજકોટ - મને અડી જુઓ તો ખબર પડે! * મોદીસાહેબનો ઇન્ટરવ્યૂ અક્ષયકુમારે લીધો, તો હવે રાહુલનો ઇન્ટરવ્યૂ કયા અભિનેતાએ લેવો જોઇએ?- ફાલ્ગુન વૈદ્ય, ઇલીનોય-અમેરિકા - અક્ષય કેસરવાળું દૂધ પીતો થયો છે. હવે એને ખાટી છાશ પીવા આપો, એ થોડું વધારે પડતું છે. * તમે કાશ્મીરમાં એકાદો પ્લોટ-બ્લોટ લીધો?- માધવ જે. ધ્રુવ, જામનગર - મારી પાસે વાર્તા કે લેખોના પ્લોટ હોય... જમીનના નહીં! * અમારી જ્ઞાતિના બધા જ કાર્યક્રમોમાં આપણું રાષ્ટ્રગીત ફરજિયાત કરી નાખ્યું. બોલો હવે?- નૂતનકુમાર ભટ્ટ, સુરત - હું એવા જ કાર્યક્રમોમાં જવાની હા પાડું છું, જ્યાં રાષ્ટ્રગીત ફરજિયાત ગવાતું હોય! * ‘બુધવારની બપોરે’ના તમારા લેખો ઉપરથી ટીવી-સિરિયલ ન બની શકે?-  સંજય આર. શાહ, અમદાવાદ -  હા, પણ બચ્ચન સા’બ રિટાયર થઇ ગયા, દિલીપ સા’બ બીમાર ને દાદામોની દેવ થઇ ગયા. હવે શું કરીશું? * લગ્ન કરાય?- ગૌતમ ચાવડા, કપડવંજ - હા. * ફોર-વ્હીલરમાં સ્ટીયરિંગ જમણી બાજુ કેમ રાખવામાં આવે છે?- વિવેક ધામેચા, ભેસાણ-જૂનાગઢ - પોલીસ જમણી બાજુ આવીને જ નામ લખે છે, માટે. * ‘પાન લીલું જોયું ને તમે યાદ આવ્યા...’, તો અત્યાર સુધી શું સૂકાં પાંદડાં જોતા હતા?- ભાવના કરમૂર, ભાણવડ - પેલા ભોળિયાને મામો બનાવવાનો બધો ખેલ છે. એને લીલા ખેતરમાં મોકલીએ તો કેટલા બધા યાદ આવે? * દરેક વાતનો વિરોધ કરનારાઓને આપ શું કહેશો? (નાગરિકતા, વગેરેના મુદ્દે) - દીપક મહેતા, રાજકોટ અને વિનાયક શુક્લ, ગોધરા - એવાને નામ જે આપવું હોય તે આપો... પાછળ અટક ‘ગાંધી’ આવવી જોઇએ! * ગમે તે વિરોધમાં તોફાનીઓ પોલીસ ઉપર હુમલો કેમ કરે છે?- રામ સતીશ, સુત્રાપાડા, ગીર સોમનાથ - એ તો તોફાનીઓ હુમલા કરે છે... આપણે બધાએ પોલીસોનો સાથ આપવો જોઇએ ને?

આજનું રાશિફળ

મેષ
Rashi - મેષ|Aries - Divya Bhaskar
મેષ|Aries

પોઝિટિવઃ- આ સમયે ગ્રહ સ્થિતિ અનુકૂળ રહેશે. વાતચીત કરીને તમે તમારા કામ કઢાવી શકશો. તમારી કોઇ નબળાઈ ઉપર પણ તમે કામ કઢાવી શકવામાં સક્ષમ રહેશો. મિત્રોનો સાથ અને સહયોગ તમારી હિંમત અને તાકાતને વધારશે. ને...

વધુ વાંચો