મોંઘવારીએ 24 વર્ષનો રેકોર્ડ તોડ્યો:1998 પછી પ્રથમ વખત જથ્થાબંધ મોંઘવારી દર 15%ને પાર થયો; પેટ્રોલ અને ડીઝલે ચીજવસ્તુઓના ભાવમાં આગ લગાવી

વધતી મોંઘવારીએ લોકોનું જીવન મુશ્કેલ બનાવી દીધું છે. ખાવા-પીવાની ચીજવસ્તુઓ, ઇંધણ અને વીજળીના ભાવમાં વધારાને કારણે જથ્થાબંધ મોંઘવારી દર સતત 13મા મહિને ડબલ ડિજિટમાં રહ્યો છે. એપ્રિલમાં હોલસેલ પ્રાઇસ ઇન્ડેક્સ આધારિત (WPI) મોંઘવારી દર 15.08% પર પહોંચ્યો છે. ડિસેમ્બર 1998 પછી પહેલીવાર જથ્થાબંધ મોંઘવારી દર 15%ને પાર થઈ ગયો છે. ડિસેમ્બર 1998માં એ 15.32 ટકા હતો.

અગાઉ એ માર્ચ 2022માં 14.55 ટકા હતો, જ્યારે ફેબ્રુઆરીમાં 13.11 ટકા હતો. એપ્રિલ 2021થી જથ્થાબંધ ફુગાવો બે આંકડામાં રહ્યો છે. નિષ્ણાતોના મતે ખાદ્યપદાર્થો અને ઈંધણના વધતા ભાવને કારણે મોંઘવારી વધી રહી છે.

રેકોર્ડ બ્રેક ફુગાવો

ઈંધણ અને ઊર્જાએ વધારી મોંઘવારી
એપ્રિલ મહિનામાં ખાદ્ય ચીજોનો ફુગાવાનો દર 8.35% રહ્યો છે, જે માર્ચ 2022માં 8.06% હતો. બળતણ અને ઊર્જાનો મોંઘવારી દર વધીને 38.66% થયો છે, જે માર્ચ 2022માં 34.52% હતો, મેન્યુફેક્ચરિંગ ઉત્પાદનોનો મોંઘવારી દર એપ્રિલમાં 10.85% હતો, જે માર્ચ 2022માં 10.71% હતો.

છૂટક મોંઘવારી 8 વર્ષની ટોચ પર
અગાઉ ખાદ્ય ચીજવસ્તુઓમાંથી તેલની કિંમતોમાં વધારો થવાને કારણે છૂટક મોંઘવારી 8 વર્ષની ટોચ પર પહોંચી ગઈ છે. સરકારી આંકડા અનુસાર, કન્ઝ્યુમર પ્રાઇસ ઇન્ડેક્સ (CPI) આધારિત છૂટક મોંઘવારી એપ્રિલમાં વધીને 7.79% થઈ છે. મે 2014માં ફુગાવો 8.32% હતો.

મોંઘવારી કેવી રીતે માપવામાં આવે છે?
ભારતમાં મોંઘવારીના બે પ્રકાર છે. એક રિટેલ, એટલે કે છૂટક અને બીજી જથ્થાબંધ મોંઘવારી છે. રિટેલ મોંઘવારી દર સામાન્ય ગ્રાહકો દ્વારા ચૂકવવામાં આવતી કિંમતો પર આધાર રાખે છે. એને કન્ઝ્યુમર પ્રાઇસ ઇન્ડેક્સ (CPI) પણ કહેવામાં આવે છે. જ્યારે હોલસેલ પ્રાઇસ ઇન્ડેક્સ (WPI)નો અર્થ એ કિંમતો સાથે હોય છે, જે જથ્થાબંધ બજારમાં એક વેપારી બીજા વેપારી પાસેથી વસૂલ કરે છે. આ કિંમતો જથ્થાબંધમાં કરવામાં આવેલા સોદા સાથે જોડાયેલી હોય છે.