ટ્વીટ ભારે પડ્યું:એક ટ્વિટથી ઇલોન મસ્કે 1 લાખ કરોડ અને નં. 1નો દરજ્જો ગુમાવ્યો

દુનિયાની સૌથી મૂલ્યવાન કંપની ટેસ્લાના ફાઉન્ડર અને સીઈઓ ઇલોન મસ્ક ટિ્વટ કરીને પણ સમાચારોમાં ચમકતા હોય છે. હાલમાં જ મસ્કે એક ટિ્વટ કરતા જ અમેરિકન શેરબજારની કેટલીક અજાણી કંપનીઓના શેરના ભાવ આસમાને પહોંચી ગયા હતા. જોકે, ક્યારેક મસ્ક ટિ્વટ કરીને અજાણતા જ પોતાના પગ પર પણ કુડાહી મારી દે છે.

સોમવારે પણ કંઈક આવું જ થયું. મસ્કે એક ટિ્વટ કરી કે, ‘બિટકોઈન અને ઈથરની કિંમત વધુ છે.’ આ ટિ્વટથી બિટકોઈનના ભાવ 17%થી વધુ ઘટી ગયા અને આ ઘટાડો હજુ પણ ચાલુ છે. એટલું જ નહીં, તેમની કંપની ટેસ્લાના શેરમાં પણ કડાકો બોલી ગયો. આ સાથે જ મસ્કની સંપત્તિમાં પણ 15 અબજ ડૉલર એટલે કે રૂ. 1.09 લાખ કરોડનો ઘટાડો નોંધાયો. તેથી તેઓ એક જ દિવસમાં દુનિયાની સૌથી ધનવાન વ્યક્તિનો તાજ ગુમાવીને બીજા નંબરે આવી ગયા.

મસ્કે થોડા દિવસ પહેલાં જ ક્રિપ્ટોકરન્સી બિટકોઈનનાં વખાણ કર્યાં હતાં. તેમણે કહ્યું હતું કે ટેસ્લાએ પણ બિટકોઈનમાં રૂ. 10 હજાર કરોડનું રોકાણ કર્યું છે. આ ટિ્વટ પછી બિટકોઈનના ભાવ ઑલ ટાઈમ હાઈ પહોંચ્યા હતા, પરંતુ બે અઠવાડિયાંમાં જ મસ્કે બિટકોઈનના ભાવ વધુ પડતા હોવાનું કહેતા તેમાં કડાકો બોલી ગયો.

મસ્કની સંપત્તિ ઘટતાં જેફ બેઝોસ ફરી દુનિયાની સૌથી ધનવાન વ્યક્તિ...
ઇલોન મસ્કની સંપત્તિ ઘટતાં જ એમેઝોનના ફાઉન્ડર જેફ બેઝોસ ફરી એકવાર દુનિયાની સૌથી ધનવાન વ્યક્તિ બની ગયા. મસ્કની કંપની ટેસ્લાના શેરોમાં છેલ્લા લગભગ એક વર્ષમાં 794%નો વધારો થયો છે. જાન્યુઆરીની શરૂઆતમાં જ ટેસ્લાના શેર 25% વધ્યા હતા. મસ્ક બેઝોસથી આગળ નીકળી ગયા હતા.