બર્નાર્ડ અર્નોલ્ટ વિશ્વની સૌથી ધનિક વ્યક્તિ બની:ગૌતમ અદાણી ત્રીજા સ્થાને પહોંચ્યા, મસ્કની નેટવર્થમાં સતત ઘટાડો

ઇલોન મસ્ક હવે વિશ્વના સૌથી ધનિક વ્યક્તિની હરોળમાં પાછળ રહી ગયા છે. ફ્રેન્ચ અબજોપતિ અને લૂઈસ વિટન મોએટ હેનેસીના સીઈઓ બર્નાર્ડ અર્નોલ્ટ તેમને પછાડીને પ્રથમ સ્થાન પર પહોંચી ગયા છે. મસ્કની નેટવર્થમાં ઘટાડાનું કારણ ટેસ્લાના શેરમાં સતત ઘટાડો અને LVMH શેયર્સમાં વધારો છે. બ્લૂમબર્ગ બિલિયોનેર્સ ઈન્ડેક્સ અને ફોર્બ્સ બંનેમાં મસ્ક બીજા નંબરે પહોંચી ગયા છે.

મસ્કની કુલ સંપત્તિ 13.5 લાખ કરોડ રૂપિયા
બ્લૂમબર્ગ અનુસાર અર્નોલ્ટની નેટવર્થ હવે $171 બિલિયન (આશરે 14.12 લાખ કરોડ રૂપિયા) છે, જ્યારે ઇલોન મસ્કની નેટવર્થ માત્ર $164 બિલિયન (આશરે 13.5 લાખ કરોડ રૂપિયા) છે. ભારતીય અબજોપતિ ગૌતમ અદાણી $125 બિલિયન (આશરે 10.32 લાખ કરોડ રૂપિયા)ની નેટવર્થ સાથે ત્રીજા ક્રમે છે.

તેના પછી એમેઝોનના ફાઉન્ડર જેફ બેઝોસ અને બિલ ગેટ્સનો નંબર આવે છે. બંનેની નેટવર્થ $116 બિલિયન (લગભગ 9.5 લાખ કરોડ રૂપિયા) છે. મુકેશ અંબાણી $89.7 બિલિયન (લગભગ 7.41 લાખ કરોડ રૂપિયા) સાથે નવમા સ્થાને છે.

અર્નોલ્ટની કુલ સંપત્તિ 15.58 લાખ કરોડ રૂપિયા
ફોર્બ્સ અનુસાર મસ્કની કુલ સંપત્તિ 176.8 બિલિયન ડોલર (લગભગ 14.60 લાખ કરોડ રૂપિયા) છે. સૌથી ધનિક લોકોની યાદીમાં બીજા સ્થાને આવતા પહેલા તેમની કુલ સંપત્તિ લગભગ $185 બિલિયન હતી. તેમજ, અર્નોલ્ટની નેટવર્થ $188.6 બિલિયન (લગભગ 15.58 લાખ કરોડ રૂપિયા) પર પહોંચી ગઈ છે.

જો કે, મસ્ક હજુ પણ ગૌતમ અદાણી કરતા ઘણા આગળ છે. અદાણીની નેટવર્થ $134.2 બિલિયન (આશરે 11.08 લાખ કરોડ રૂપિયા) છે. મુકેશ અંબાણી $92.5 બિલિયન (લગભગ 7.64 લાખ કરોડ રૂપિયા) સાથે 8મા નંબરે છે.

ઇલોન મસ્કની નેટવર્થમાં કેમ ઘટાડો થયો?
મસ્કની કંપની ટેસ્લાનો સ્ટોક સોમવારે 6.87 ડોલર અથવા 4.09% ઘટીને 160.95 ડોલર પર બંધ થયો. શેરના ભાવ ઘટવાના કારણે મસ્કની નેટવર્થ ઘટી છે. બીજી તરફ, આખા વર્ષ વિશે વાત કરીએ, તો અત્યાર સુધીમાં ટેસ્લાનો શેર 158.55 અથવા 49.62% ઘટ્યો છે. એટલે કે, તે લગભગ અડધું થઈ ગયું છે. ઓગસ્ટમાં પણ મસ્કે તેના ટ્વિટર એક્વિઝિશનને ફંડ આપવા માટે ટેસ્લાના લગભગ 7 બિલિયન ડોલરના મૂલ્યના શેર વેચ્યા હતા.

મસ્કે શું કહ્યું?
એક યુઝરે મસ્કને ટ્વીટ કરીને ટેસ્લાના રોકાણકારોને થતા નુકસાન વિશે પૂછ્યું. જવાબમાં મસ્કે નેટ પ્રેઝન્ટ વેલ્યૂના મેથેમેટિકલ ઇક્વેશન સાથે જવાબ આપ્યો. એક મીડિયા રિપોર્ટ અનુસાર, ટેસ્લા એ અમેરિકન કાર કંપનીની સૌથી મૂલ્યવાન કંપની છે. અન્ય એક ટ્વિટમાં મસ્કે લખ્યું છે કે, ટેસ્લાના રોકાણકારોને ટ્વીટરથી લાંબા ગાળે ફાયદો થશે.

બર્નાર્ડ અર્નોલ્ટ કોણ છે?
બર્નાર્ડ અર્નોલ્ટને મોર્ડન લક્ઝરી ફેશન ઇન્ડસ્ટ્રીના ગોડફાધર માનવામાં આવે છે. તેઓ લુઈસ વીટન મોએટ હેનેસી (LVMH)ના ફાઉન્ડર, ચેરમેન અને સૌથી મોટા શેરહોલ્ડર છે, જે વિશ્વના સૌથી મોટા ફેશન સમૂહ છે.