સારા સમાચાર:હાઉસિંગ માર્કેટમાં અમદાવાદ દેશમાં સૌથી સસ્તું; મુંબઈ કરતાં અડધા ભાવે મકાન મળે છે, રાજ્યમાં બીજા ક્વૉર્ટરમાં હોમ લોનની માંગ વધીને રૂપિયા 5,283 કરોડ થઈ

હાઉસિંગના માર્કેટમાં અમદાવાદ દેશમાં સૌથી સસ્તું શહેર છે. નાઈટ ફ્રેન્ક પ્રોપર્ટી કન્સલ્ટન્સીના રિપોર્ટમાં આ વાત બહાર આવી છે. આ રિપોર્ટ મુજબ, દેશમાં મુંબઈ સૌથી મોંઘું શહેર છે. એજન્સીએ આ રિપોર્ટ પ્રોપર્ટીની કિંમત, હોમ લોનનું વ્યાજ અને ઘર ખરીદનારની આવકને ધ્યાનમાં રાખીને બનાવ્યો છે. 2010માં એફોર્ડેબલ હાઉસિંગમાં અમદાવાદની ટકાવારી 46% હતી , જે 2020માં 24% થઈ ગઈ છે, એટલે કે અમદાવાદમાં ધારી લો મારી આવક 100 રૂપિયા હોય તો એમાંથી 24 રૂપિયા EMIમાં જાય, જ્યારે મુંબઈમાં મારી આવક 100 રૂપિયા હોય તો 61 રૂપિયા EMIમાં જાય. અમદાવાદ પછી ચેન્નઈ અને પુણે સસ્તું છે.

નાઈટ ફ્રેન્ક પ્રોપર્ટી ઈન્ડિયાના ચેરમેન અને મેનેજિંગ ડિરેક્ટર શિશર બૈજલના જણાવ્યા મુજબ, દેશનાં ટોપ 8 શહેરમાં પરવડે એવા મકાનનો આ રેસિયો સારોએવો સુધર્યો છે. એની પાછળનાં મુખ્ય કારણોમાં આવકમાં વધારો, નીચો વ્યાજદર, પ્રોપર્ટીની કિંમતમાં ઘટાડો, સ્ટેમ્પ ડ્યૂટીમાં ઘટાડો છે.

સપ્ટેમ્બર ત્રિમાસિક ગાળામાં હાઉસિંગ લોનનું વિતરણ 46 ટકા વધી રૂપિયા 5,283 કરોડ થયું
ગુજરાતમાં હાઉસિંગ સેક્ટરમાં ફરી માંગ વધી રહી હોવાના સ્પષ્ટ સંકેત મળી રહ્યા છે. સમગ્ર ગુજરાતમાં નવેસરથી આપવામાં આવતી હાઉસિંગ લોનનું પ્રમાણ સપ્ટેમ્બર,2020માં પૂરા થયેલા ત્રિમાસિક ગાળામાં 46 ટકા વધીને રૂપિયા 5,283 કરોડ થયુ છે, જે ગત વર્ષની સમાન અવધિમાં રૂપિયા 3,620 કરોડ નોંધાઈ હતી, તેમ સ્ટેટ લેવલ બેન્કર્સ કમિટી (SLBC) તરફથી જાહેર કરવામાં આવેલી માહિતીમાં જણાવાયું છે. અલબત એપ્રિલ-જૂન ત્રિમાસિક ગાળામાં જે રૂપિયા 2,298 કરોડની લોન વિતરણ કરવામાં આવી હતી તેની તુલનામાં 130 ટકાની નોંધપાત્ર વૃદ્ધિ દર્શાવે છે.

જુલાઈ-સપ્ટેમ્બર ત્રિમાસિક ગાળા દરમિયાન હાઉસિંગ સેક્ટરમાં માંગમાં નોંધપાત્ર વધારો થયો છે. કોરોના મહામારી દરમિયાન રિયલ એસ્ટેડ સેક્ટરમાં જે લોકોએ રોકાણ કર્યું હતું તેમને નોંધપાત્ર પ્રમાણમાં અસર થઈ ન હતી. તેને લીધે ત્રિમાસિક ગાળા દરમિયાન હાઉસિંગ લોનની નવેસરથી ફાળવણી કરવામાં આવી રહી છે. હાઉસિંગ સેક્ટર સંકળાયેલા અગ્રણીઓએ પણ એ વાતની પૃષ્ટિ આપી છે કે સપ્ટેમ્બર ત્રિમાસિક ગાળા દરમિયાન આવાસના વેચાણમાં નોંધપાત્ર પ્રમાણમાં વધારો થયો છે.