ગૌતમ અદાણી રોકાણકારોનો વિશ્વાસ જીતવામાં વ્યસ્ત:સિંગાપોર-હોંગકોંગ બાદ હવે અદાણી ગ્રુપ લંડન, દુબઈ અને અમેરિકામાં રોડ શો કરશે

સિંગાપોર અને હોંગકોંગ બાદ હવે અદાણી ગ્રુપ રોકાણકારોનો વિશ્વાસ જીતવા માટે ટૂંક સમયમાં યુએસ, લંડન અને દુબઈમાં ફિક્સ્ડ ઈન્કમ રોડ-શો યોજવા જઈ રહ્યું છે. તાજેતરમાં, અદાણી જૂથે સિંગાપોર અને હોંગકોંગમાં ફિક્સ્ડ ઈન્કમ રોડ-શો કર્યા, જે ખૂબ સફળ રહ્યા. આ રોડ-શો બાદ રોકાણકારોનો ભરોસો ઘણા અંશે પુનઃસ્થાપિત થયો છે.

રોઇટર્સના અહેવાલ મુજબ, અદાણી જૂથ આ મહિને લંડન, દુબઇ અને યુએસના કેટલાક શહેરોમાં ફિક્સ્ડ-ઇન્કમ રોડ શોનું આયોજન કરશે. અમેરિકન શોર્ટ સેલર હિંડનબર્ગ રિસર્ચનો રિપોર્ટ બહાર આવ્યા બાદ અદાણી ગ્રુપના શેરમાં જોરદાર ઘટાડો જોવા મળ્યો હતો.

જેના કારણે અદાણી ગ્રુપ પર રોકાણકારોનો વિશ્વાસ ઘટી ગયો છે. હવે આ રોડ-શો દ્વારા અદાણી ગ્રુપ તેના રોકાણકારોનો વિશ્વાસ પાછો મેળવવાનો પ્રયાસ કરી રહ્યું છે. રોડ શો ઉપરાંત, અદાણી જૂથ રોકાણકારોનો વિશ્વાસ પાછો મેળવવા માટે અન્ય ઘણા પ્રયાસો કરી રહ્યું છે.

અદાણી ગ્રુપનો રોડ શો 7 માર્ચથી 15 માર્ચ દરમિયાન યોજાશે
અદાણી ગ્રુપ મેનેજમેન્ટ મેમ્બર્સ અને ગ્રુપ ચીફ ફાયનાન્સિયલ ઓફિસર જુગશિંદર સિંહ પણ રોડ શોમાં ભાગ લેશે. રોઇટર્સના અહેવાલ મુજબ, આ રોડ શો 7 માર્ચથી 15 માર્ચ સુધી લંડન, દુબઇ અને યુએસના કેટલાક શહેરોમાં યોજાશે. ગ્રુપને આશા છે કે આ રોડ-શો દ્વારા તેઓ રોકાણકારોને મળી શકશે અને કંપનીમાં રોકાણકારોનો વિશ્વાસ વધુ વધારશે.

સિંગાપોર-હોંગકોંગ રોડ-શોમાં ગ્રુપના શેરમાં તેજી જોવા મળી હતી
અદાણી ગ્રુપના રોડ શોની અસર સિંગાપોર-હોંગકોંગમાં પણ જોવા મળી રહી છે. રોડ-શો પછી ગ્રુપના શેરમાં જબરદસ્ત વૃદ્ધિ જોવા મળી રહી છે. ગ્રુપનું માર્કેટ કેપ પણ વધીને રૂ. 1 લાખ કરોડ થઈ ગયું છે. શેરોમાં પણ 75થી 80% સુધીનો ઉછાળો છે.