મોબાઈલ ફોન પરનો GST 12થી 18% કરાયો, કિંમતમાં 6 ટકા વધારો થશે

નવી દિલ્હીઃ આગામી તા. 1 એપ્રિલથી મોબાઈલ ફોન 6 ટકા મોંઘા થઈ જશે. કેન્દ્રીય નાણામંત્રી નિર્મલા સીતારમણની અધ્યક્ષતા હેઠળ મળેલી જીએસટી કાઉન્સિલની 39ની બેઠકમાં મોબાઈલ ફોન પરનો જીએસટી 12 ટકાથી વધારી 18 ટકા કરવાનો નિર્ણય લેવાયો હતો. બીજીબાજુ સરકારે હાથથી અને મશીનથી બનાવાતી માચીસ પરનો દર વધારીને 12 ટકા કર્યો છે. એમઆરઓને પ્રોત્સાહન આપવા તેના જીએસટી દરમાં ઘટાડો કરાયો છે. અગાઉ 18 ટકા વસૂલાત થતી હતી હવે 5 ટકા થશે. જીએસટી નેટવર્કને વધુ મજબૂત બનાવવા માટે અને તેની આમી દૂર કરવા હવે પછીની ત્રણ બેઠકમાં ઇન્ફોસિસના વડા નંદન નિલેકણી હાજર રહેશે.

એરક્રાફ્ટ મેન્ટેનન્સ પર સર્વિસ ટેક્સ ઘટાડીને 5 ટકા કરવામાં આવ્યો
કાઉન્સિલમાં લેવાયેલા બીજા નિર્ણયો પ્રમાણે માચિસ પર 12 ટકા GST લાગશે. પહેલા હેન્ડ મેડ માચિસ પર 5 ટકા GST લાગતો હતો. GSTના નવા રેટ 1 એપ્રિલથી લાગૂ થશે. તે સિવાય એરક્રાફ્ટ મેન્ટેનન્સ, રિપેર અને ઓવરઓલ સર્વિસ પર GST રેટને 18 ટકાથી ઘટાડીને 5 ટકા કરવામાં આવ્યો છે. ભારતમાં આ સર્વિસના અભાવના કારણે એરલાઇન્સ કંપનીઓને વિમાનોને મેન્ટેનન્સ માટે વિદેશ મોકલવા પડે છે જેના પર વધારે ખર્ચો થાય છે.