બેકાર દિન / SBIના રિપોર્ટ અનુસાર આ વર્ષે 16 લાખ નોકરીઓ ઓછી સર્જાશે

According to the SBI report, 16 lakh fewer jobs will be created this year

  • રોજગારી પર પણ આર્થિક મંદીનો ડર
  • 2019માં 89.7 લાખ નોકરી મળી હતી, આ વર્ષે 73.9 લાખ રોજગારી સર્જનનું અનુમાન

Divyabhaskar.com

Jan 14, 2020, 01:55 AM IST
મુંબઈ: દેશની સૌથી મોટી સ્ટેટ બેન્ક ઓફ ઈન્ડિયાએ આર્થિક મંદીની એક ડરામણી તસવીર જાહેર કરી છે. બેન્કે ચાલુ નાણાકીય વર્ષ 2019-20માં વિવિધ ક્ષેત્રે ગયા વર્ષ કરતા 16 લાખ ઓછી નોકરી પેદા થવાનું અનુમાન લગાવ્યું છે. 2018-19માં 89.7 લાખ રોજગારનું સર્જન થયું હતું. સ્ટેટ બેન્કના ચીફ ઈકોનોમિક એડવાઈઝર ડૉ. સૌમ્યા કાંતિ ઘોષ અને તેમની રિસર્ચ ટીમે ઈપીએફઓનું ડેટા વિશ્લેષણ કરીને તૈયાર કરેલો આ રિપોર્ટ સોમવારે જાહેર થયો હતો. ઈપીએફઓના આંકડા સામાન્ય રીતે
ઓછા પગારની નોકરીઓ બતાવે છે કારણ કે, તેમાં પગારની મહત્તમ મર્યાદા માસિક રૂ. 15 હજાર હોય છે. આ રિપોર્ટ પ્રમાણે, એપ્રિલ-ઓક્ટોબર 2019 સુધી કુલ નવી નોકરીઓ 43.1 લાખ હતી, જ્યારે 2019-20માં આ આંકડો 73.9 લાખે પહોંચે છે. ઈપીએફઓના આંકડા સરકારી નોકરી, રાજ્ય સરકારની નોકરી અને પ્રાઈવેટ નોકરીઓ કવર નથી કરતા કારણ કે, 2004 પછી આ ડેટા નેશનલ પેન્શન સ્કીમ (એનપીએસ)માં શિફ્ટ થઈ ચૂક્યો છે.
હાલના અનુમાન પ્રમાણે, એનપીએસ કેટેગરીમાં પણ કેન્દ્ર અને રાજ્ય સરકારો દ્વારા 2019-20માં 39 હજાર ઓછી નોકરી પેદા થવાનું અનુમાન છે. એશિયાના ત્રીજા સૌથી મોટા અર્થતંત્ર ભારતનો વિકાસ દર આ વર્ષે 5% રહેવાનું અનુમાન છે, જ્યારે એસબીઆઈએ 4.6%નું અનુમાન લગાવ્યું છે.
એસબીઆઈનો રિપોર્ટ ચિંતાજનક હોવાના કારણો
- બ્લૂમબર્ગના રિપોર્ટ પ્રમાણે, દેશમાં બેકારી દર 45 વર્ષની સર્વોચ્ચ સપાટીએ પહોંચી ગયો છે.
- સરકાર દસકાના સૌથી ઓછા આર્થિક વૃદ્ધિ દરનો સામનો કરી રહી છે. એનસીઆરબીના ડેટા પ્રમાણે, 2018માં 12 હજારથી વધુ બેકારોએ આત્મહત્યા કરી હતી. આથી ઓછી નોકરીઓ મોદી સરકાર માટે દબાણ ઊભું કરશે.
- આંકડાશાસ્ત્રી પ્રણબ સેને એક ઈન્ટરવ્યૂમાં કહ્યું હતું કે, દેશમાં ઔપચારિક ક્ષેત્રોમાં નોકરીઓ સતત ઘટી રહી છે. નોટબંધીના કારણે રોકડ અર્થતંત્રની કમર તૂટી ગઈ હતી. યુવાન, અભણ અને અકુશળ લોકોને પહેલી તક અનૌપચારિક ક્ષેત્રમાં મળે છે. ત્યાર પછી ઔપચારિક સંસ્થાઓમાં તેમને જગ્યા મળે છે, પરંતુ એ પરંપરા હવે તૂટી ગઈ છે.
નોકરીઓ તો ઘટી, સાથે ઓછા ઈન્ક્રીમેન્ટની આશંકા
આ રિપોર્ટ પ્રમાણે, ચાલુ વર્ષે નોકરીઓ તો ઘટશે જ, પરંતુ સાથે કંપનીઓ ઇન્ક્રીમેન્ટ પણ ઓછું આપશે. આ કારણસર લોકો ઘરે પૈસા પણ ઓછા મોકલશે, જેની અસર ખરીદી પર દેખાશે. આ ઉપરાંત પ્રવાસી શ્રમિકો દ્વારા વિવિધ રાજ્યોમાં મોકલેલા પૈસાના આંકડાના સેમ્પલ દર્શાવે છે કે, આસામ, બિહાર, રાજસ્થાન, ઓડિશા અને યુપી જેવા રાજ્યોમાં શ્રમિકો દ્વારા ઓછા પૈસા મોકલાઈ રહ્યા છે.
X
According to the SBI report, 16 lakh fewer jobs will be created this year
COMMENT

Next Stories

    ની  સંપૂર્ણ વાંચનસામગ્રી