મૂવી રિવ્યૂ / 'ભારત'ના રોલમાં સલમાન ખાન ફિટ નથી બેસતો

movie review Salman Khan does not fit in the role of bharat,
X
movie review Salman Khan does not fit in the role of bharat,

divyabhaskar.com

Jun 05, 2019, 11:16 AM IST
ફિલ્મ રિવ્યૂઃ ભારત
રેટિંગઃ 3/5
સ્ટાર-કાસ્ટઃ સલમાન ખાન, કેટરીના કૈફ, દિશા પટની, તબુ, જેકી શ્રોફ
ડિરેક્ટરઃ અલી અબ્બાસ ઝફર
પ્રોડ્યૂસરઃ અતુલ અગ્નિહોત્રી, ભૂષણ કુમાર
સંગીતઃ વિશાલ-શેખર
જોનરઃ એક્શન ડ્રામા

મુંબઈઃ ડિરેક્ટર અલી અબ્બાસની ફિલ્મ 'ભારત' સાઉથ કોરિયન ફિલ્મ 'ઓડ ટુ માય ફાધર'ની ઓફિશિયલ રીમેક છે. અલી અબ્બાસ ફિલ્મમાં સતત પ્રયાસ કરે છે કે ફિલ્મના હિરો ભારતના (સલમાન ખાન) 62 વર્ષ બતાવવામાં આવે. ફિલ્મની શરૂઆત 1942થી થાય છે, જ્યારે ભારત આઠ વર્ષનો હતો અને ફિલ્મ 2009માં પૂરી થાય છે, જ્યારે તેની ઉંમર 70 વર્ષની હોય છે. ફિલ્મની વાર્તા એક સામાન્ય વ્યક્તિની છે, જે પોતાના જીવનમાં સંઘર્ષ કરે છે અને પોતાના પિતાનું વચન પૂરું કરવાનો પ્રયાસ કરે છે. ફિલ્મમાં ભારતની વ્યક્તિગત સફરની સાથે સાથે 60 વર્ષમાં દેશમાં થયેલા આર્થિક તથા સામાજિક પરિવર્તન પણ જોવા મળ્યાં છે.

ફિલ્મની શરૂઆત થાય છે, ત્યારે દેશમાં ભારત-પાકિસ્તાનના ભાગલાનો માહોલ હોય છે અને ભારતના પિતા (જેકી શ્રોફ) પોતાની પત્ની (સોનાલી કુલકર્ણી) તથા ચાર બાળકો સાથે ભારત આવવા ઈચ્છે છે. પરિવાર જ્યારે પાકિસ્તાનથી ભારત આવવાની ટ્રેનમાં બેસે છે, ત્યારે ભારતની બહેન ગુડિયા પરિવારથી અલગ થઈ જાય છે. ભારતના પિતા નક્કી કરે છે કે તે પાકિસ્તાનમાં જ રહેશે અને દીકરીને શોધશે. તે દીકરા ભારત પાસેથી વચન લે છે કે તે પરિવારનું ધ્યાન રાખશે. ભારત માતા તથા બે ભાઈ-બહેન સાથે ફોઈના ઘરે આવે છે. ફોઈ રેશનિંગની દુકાન ચલાવે છે અને ભારત આ દુકાનને બચાવીને રાખવા માગે છે, કારણે આ જ તેના પિતાજીને જોડતી અંતિમ કડી છે. તેને આશા છે કે તેના પિતા ક્યારેક તો પરિવારને શોધતા શોધતા અહીંયા આવશે.

કેવી છે સલમાન ખાનની ભારત?

આ ફિલ્મની વાર્તા (અલી ઝફર તથા વરૂણ શર્માએ સાથે મળીને લખી છે) પડકારજનક તથા રસપ્રદ છે. ફિલ્મમાં ભારતની વ્યક્તિગત સફરની સાથે સાથે દેશમાં 60 વર્ષમાં થયેલો વિકાસ બતાવવામાં આવ્યો છે. ભારત તથા તેનો વિલાયતી (સુનિલ ગ્રોવર) મિત્ર નાનપણમાં ધ ગ્રેટ રશિયન સર્કસમાં કામ કરતા હોય છે અને અહીંયા જ મોટા થાય છે. ભારતનો સ્કૂટર સ્ટંટ 60ના દાયકામાં ઘણો જ લોકપ્રિય હતો. તે અહીંયા રાધા (દિશા પટની)ને મળે છે. રાધા, ભારતને પ્રેમ કરતી હોય છે. ભારત સર્કસ છોડીને 80ના દાયકામાં અરબ જાય છે. આ સમયે મિડલ ઈસ્ટમાં તેલના કૂવાઓ હતાં અને અનેક ભારતીયો કામની શોધમાં ગલ્ફ દેશોમાં જતા હતાં. આ સમય દરમિયાન ભારતની મુલાકાત કુમુદ (કેટરીના કૈફ) સાથે થાય છે અને બંને એકબીજાને પ્રેમ કરે છે. આ દરમિયાન ભારતના ફુઆ (કુમુદ મિશ્રા) રેશનિંગની દુકાન વેચવા માગે છે, તો તેને બચાવવા માટે ભારત તથા વિલાયતી મર્ચેન્ટ નેવીમાં કામ કરે છે. આ સમય છે 90ના દાયકાનો. આ સમય દરમિયાન મનમોહન સિંહે દેશમાં ઉદારીકરણની નીતિ અમલી બનાવી હતી. વચ્ચે 1983નો ક્રિકેટ વર્લ્ડ કપની જીત, બે સુપરસ્ટાર્સ શાહરુખ ખાન તથા સચિન તેંડુલકરની વાતનો પણ ઉલ્લેખ થાય છે.

2. અનેક જગ્યાએ ફિલ્મે નિરાશ કર્યાં

ફિલ્મમાં 60 વર્ષનો સફર બતાવવાનો પૂરતો પ્રયાસ કરવામાં આવ્યો છે પરંતુ ફિલ્મનું  ડિરેક્શન અનેક જગ્યાએ નિરાશાજનક જોવા મળે છે. ડિરેક્ટર સામે સૌથી મોટો પડકાર હતો. કેટલીક જગ્યાએ તેમણે વધુ પડતી સિનેમેટીક લિબર્ટી લીધી છે. સર્કસ સિક્વન્સ તથા અરબમાં માઈનિંગ સિક્વન્સ ઘણી જ સારી રીતે દર્શાવવામાં આવી છે.

3. સલમાન રોલ માટે પર્ફેક્ટ નથી

ફિલ્મમાં ડિરેક્ટરનું ફોક્સ વધુમાં વધુ એ બતાવવામાં છે કે તેમનો હિરો કેટલો બહાદુર છે. સલમાન ખાન આ રોલમાં સહેજ પણ સારો લાગતો નથી. આ કેરેક્ટરમાં બહાદુરીની જગ્યાએ સંવેદનશીલતા વધુ જરૂરી હતી, જે સલમાન ખાન કરી શકતો નથી. 20 વર્ષના રોલ માટે સલમાન ખાન ઘણો જ મોટો લાગે છે અને 70 વર્ષના વૃદ્ધના રોલમાં તે નાનો લાગે છે. સલમાનનો મેક-અપ તથા બૉડી લેંગ્વેજ દર્શકોને વિશ્વાસ અપાવી શક્યા નહીં કે તે 70 વર્ષનો છે.

કેટરીના કૈફે સારો પ્રયાસ કર્યો છે અને આ તેના બેસ્ટ પર્ફોમન્સમાંથી એક છે. સુનિલ ગ્રોવરે સારું કામ કર્યું છે. દિશા પટની ઘણી જ સુંદર દેખાય છે અને તેણે સારું કામ કર્યું છે. ફિલ્મના અન્ય પાત્રો જેકી શ્રોફ, કુમુદ મિશ્રાએ સારો સપોર્ટ આપ્યો છે. તબુનો રોલ ઘણો જ નાનો છે પરંતુ તે આટલા નાના રોલમાં પણ છવાઈ જાય છે.

4. સંગીત

ફિલ્મની સિનેમેટોગ્રાફી સારી છે. વિશાલ શેખરનું સંગીત પણ સારું છે. ફિલ્મ 2 કલાક 40 મિનિટની છે. જે વધુ પડતી લાંબી છે.

5. જોવી કે નહીં?

તમે સલમાનના ડાય હાર્ડ ફૅન હોવ તો આ ફિલ્મ તમારા માટે છે. સલમાન ફિલ્મની દરેક ફ્રેમમાં જોવા મળશે.

COMMENT

Next Stories

    ની  સંપૂર્ણ વાંચનસામગ્રી