Home »Abhivyakti »Editorial Article» Trump Government And The H-1B Visa Controversy

ટ્રમ્પ સરકાર અને H-1B વિઝાનો વિવાદ

Editorial Article | Feb 10, 2017, 03:31 AM IST

  • ટ્રમ્પ સરકાર અને H-1B વિઝાનો વિવાદ,  editorial article news in gujarati
પ્રમુખપદની ચૂંટણી વખતે ટ્રમ્પે આપેલાં અનેક વચનોમાં એક મુખ્ય વચન બેરોજગારી ઘટાડવાનું અને અમેરિકાના લોકો પાસેથી છીનવાતી નોકરીઓ અટકાવવાનું હતું. તેમના રાજમાં સંસદમાં મુકાયેલો એક ખરડો H-1B વિઝા ધરાવતા લોકોનો પગાર બમણો કરવાની દરખાસ્ત ધરાવે છે. H-1B વિઝા એટલે સાદી ભાષામાં કહીએ તો, એવો પરવાનો જે ખાસ લાયકાત ધરાવતા વિદેશીઓને આપવામાં આવે છે. તેમને જે કામ આવડે છે, તે કામ કરનારા અમેરિકામાં સ્થાનિક ધોરણે મોજૂદ ન હોવો જોઈએ. વર્તમાન કાયદાની એ મૂળભૂત જોગવાઈ પણ છે, જેથી અમેરિકાના લોકોના ભોગે વિદેશીઓને નોકરીઓ ન મળી જાય અને અમેરિકન કંપનીઓ ઊંચા પગારે અમેરિકનોને નોકરી આપવાના વિકલ્પે ઓછા પગારે પરદેશીઓને નોકરીએ રાખી ન લે, પરંતુ તેના ચુસ્ત અમલ વિશે ઘણાને શંકા છે.

H-1B વિઝા મર્યાદિત સંખ્યામાં જારી કરવામાં આવે છે. હાલમાં તેનો કુલ આંકડો 85,000 છે. એટલે કે અમેરિકાસ્થિત કંપનીઓ વર્ષે 85,000 કર્મચારીઓને બહારના દેશોમાંથી અમેરિકા બોલાવી શકે, પણ એ માટે કંપનીઓએ પહેલાં પુરવાર કરવું પડે કે તેમની જરૂરિયાત સંતોષી શકે એવા ઉમેદવાર અમેરિકામાં ઉપલબ્ધ નથી. માટે તેમણે વિદેશથી પ્રતિભાશાળી લોકોને બોલાવવા અનિવાર્ય છે. ત્યાર પછી કંપનીઓ દીઠ H-1B વિઝાથી ભરવાની જગ્યાઓ મંજૂર થાય, પરંતુ અમેરિકા જવા માટે દુનિયાભરમાંથી લોકોનો ધસારો એટલો હોય છે અને કંપનીઓ બહારના લોકોને બોલાવવા માટે એટલી તત્પર હોય છે કે 85,000 વિઝા સામે અરજીઓની સંખ્યા અનેક ગણી વધારે હોય છે. એક માણસ દીઠ એક જ અરજી થઈ શકે, પણ એક કંપની મહત્તમ કેટલી અરજી કરી શકે એની મર્યાદા નથી. આખરી પસંદગી કમ્પ્યુટરાઇઝ્ડ લોટરી પદ્ધતિ દ્વારા થતી હોવાથી, જે કંપનીએ વધારે અરજીઓ નાખી હોય, તેને H-1B વિઝાનો વધારે ક્વૉટા મળે એવી સંભાવના રહે છે. 

કંપનીઓ H-1B વિઝા પર કર્મચારીઓને બોલાવવા આતુર હોય, તેનાં બે મુખ્ય કારણ છેઃ અમેરિકામાં પૂરતી સંખ્યામાં પ્રતિભાશાળી લોકો નથી અને ઘણા કિસ્સામાં (ખાસ કરીને અમેરિકામાં કામ કરતી ભારતીય કંપનીઓને) આ રીતે આવતા કર્મચારીઓ પ્રમાણમાં સસ્તા પડે છે. કેમ કે, અમેરિકાનાં ધોરણ પ્રમાણે તેમને ઓછો પગાર ચૂકવવો પડે છે. અલબત્ત, તેમાં ફેસબુક જેવા અપવાદો પણ છે. 2016માં તેનો 15 ટકાથી પણ વધુ સ્ટાફ H-1B વિઝાધારકોનો હતો. આવી કંપનીઓમાં H-1B ધારકોના પગાર ઓછા હોતા નથી. પણ વાંધો ત્યારે ઊભો થાય છે જ્યારે અમેરિકામાંથી મળી રહે એવા ઉમેદવારોની, ફક્ત ઓછા પગારની લાયમાં, બહારથી H-1B પર બોલાવીને ભરતી કરવામાં આવે છે. ટ્ર્મ્પશાસન તેને ‘અમેરિકા ફર્સ્ટ’નો મુદ્દો બનાવીને તેના કથિત દુરુપયોગ પર અંકુશ મૂકી શકે, પણ H-1Bથી અમેરિકાને-તેની કંપનીઓને થતો ફાયદો પણ નજરઅંદાજ કરી શકાય એવો નાનો નથી. 
(Editorial Article Gujarati News) સાથે જોડાયેલા અન્ય (Abhivyakti Gujarati News) મેળવવા માટે અમને Facebook અને Twitter પર ફોલો કરો. વાંચતા રહો 76 લાખ+ વાચકોની મનપસંદ અને વિશ્વની નં.1 Gujarati News વેબસાઇટ divyabhaskar.co.in, જાણો સમાચારોથી વધુ. દરેક ક્ષણ અપડેટ રહેવા માટે ડાઉનલોડ કરો Gujarati News App & Divya Bhaskar epaper App.
Web Title: Trump government and the H-1B visa controversy
(Read News in Gujarati from Divya Bhaskar)
DBPL T20

Next Article

Recommended