- અવારનવાર સ્ટાફ પર થતા હુમલા તેમજ શંકાસ્પદ ગતિવિધિઓને અટકાવવા નિર્ણય
- ટ્રોમા સેન્ટર, સિવિલના મુખ્ય દરવાજા સહિતની છ જગ્યાઓ પર કેમેરા જાસૂસી કરશે
મહેસાણા સિવિલ હોસ્પિટલમાં સીસીટીવી કેમેરા ગોઠવવા કવાયત શરૂ કરાઇ છે. સિવિલમાં તબીબો પર થતા હુમલા, શંકાસ્પદ હિલચાલ સહિતની ગતિવિધિઓ પર વોચ રાખવા છ કલોઝ સિર્કટ કેમેરા ગોઠવવામાં આવશે. નોધનીય છે કે,અગાઉ આ હોસ્પિટલમાં તબીબો તેમજ નર્સો પર હુમલાના બનાવ બની ચૂક્યા છે, આવી ઘટના ખાળવાના આશયથી સીસી કેમેરા મુકવાનો નિર્ણય લેવાયો છે.
સિવિલ હોસ્પિટલમાં અવાર નવાર ફરજ પરના તબીબો તેમજ નર્સો પર થતા હુમલાની સાથે કેટલીક વખત મારામારી સહિતના બનાવોમાં એકત્રીત થતા બંને પક્ષના લોકો વચ્ચે થતી અથડામણની ઘટના અટકાવવા સિવિલ સત્તાવાળાઓ દ્વારા સીસી કેમેરા મુકવાનો નિર્ણય લેવાયો છે. જિલ્લાની એક માત્ર વિશાળ હોસ્પિટલમાં શંકાસ્પદ વ્યક્તિઓની હિલચાલ પર વોચ રાખતા આ કેમેરાઓમાં દશથી વધારે દિવસના શૂટિંગનું રેકોર્ડિંગ રાખી શકાય તેવું આયોજન કરાયું છે. આગામી દિવસોમાં હોસ્પિટલના મુખ્ય ગેટ, ટ્રોમા સેન્ટર સહિતની મહત્વની છ જગ્યાઓ પર સીસી કેમેરા ગોઠવવામાં આવશે અને તેઓ દિવસભરની ગતિવિધિઓનું રેકોર્ડીગ કરશે. નોંધનીય છે કે, અગાઉ તબીબ પર થયેલા હુમલા બાદ દાખલ થયેલી ફરિયાદને પગલે હુમલો થયો તેના પુરવા એકત્રીત કરવા મુશ્કેલ બન્યા હતા તે સંજોગોમાં હવે પછી આવી ઘટનાનો ચિતાર આ કેમેરાઓમાં કેદ થશે.
આ અંગે મહેસાણા સિવિલ હોસ્પિટલના સિવિલ સર્જન ગાંધીએ જણાવ્યું હતું કે, અહીં અઘટીત ઘટનાની સાથે શંકાસ્પદ વ્યક્તિઓની હિલચાલને નાથવા ટુંક સમયમાં હોસ્પિટલને કલોઝ સર્કીટ ટેલીવિઝન સાથે જોડી દેવાશે. અહીં ગોઠવવામાં આવનારા સીસી કેમેરાને આધારે અહીં થતા હુમલા સમયે કોનો વાંક હતો તે બાબતને જાણી શકાશે અને તેનો પુરાવા પણ ઉભો કરી શકાશે.
