નાગપુર ખાતે ન્યૂઝીલેન્ડ સામે ચાલી રહેલી શ્રેણીની ત્રીજી અને અંતિમ ટેસ્ટમાં સ્ફોટક ઓપનર વિરેન્દ્ર સેહવાગે વધુ એક સિદ્ધિ પોતાના નામે કરી લીધી છે. સેહવાગે ત્રીજી વખત સતત અડધી સદી ફટકારી છે.
સેહવાગ આ વર્ષે શાનદાર ફોર્મમાં છે. ન્યૂઝીલેન્ડ સામે ત્રણ ટેસ્ટ મેચની શ્રેણીમાં સેહવાગે સતત ત્રણ ઈનિંગ્સમાં 50થી વધુ રન ફટકાર્યા છે. સૌથી પહેલા હૈદરાબાદ ટેસ્ટની પ્રથમ ઈનિંગ્સમાં વીરૂએ 96 રન બનાવ્યા હતા. બાદમાં બીજા દાવમાં પણ સેહવાગે 54 રન બનાવ્યા હતા. હવે નાગપુર ટેસ્ટના પ્રથમ દાવમાં પણ સેહવાગે અડધી સદી ફટકારી છે.
ન્યૂઝીલેન્ડ સામે ચાલી રહેલી ટેસ્ટ શ્રેણીની અમદાવાદ ખાતે રમાયેલી પ્રથમ ટેસ્ટના પ્રથમ દાવમાં સેહવાગે શાનદાર સદી ફટકારી હતી. પરંતુ બીજા દાવમાં તે ફક્ત 1 રન બનાવીને આઉટ થઈ ગયો હતો.
સેહવાગે આ વર્ષે 12 ટેસ્ટ મેચમાં 1302 રન બનાવ્યા છે. જેમાં પાંચ સદી અને સાત અડધી સદી સામેલ છે. સેહવાગે તેની કારકિર્દીમાં સતત ત્રણ અથવા તો તેનાથી વધારે રનની અડધી સદી ત્રણ વખત ફટકારી ચૂક્યો છે.
પ્રથમ વખત- વર્ષ 2008
ઓસ્ટ્રેલિયા વિરૂદ્ધ 63 રન – એડિલેડ ટેસ્ટના પ્રથમ દાવમાં
ઓસ્ટ્રેલિયા વિરૂદ્ધ 151 રન – એડિલેડ ટેસ્ટના બીજા દાવમાં
દક્ષિણ આફ્રિકા વિરૂદ્ધ 319 રન – ચેન્નાઈ ટેસ્ટના પ્રથમ દાવમાં
બીજી વખત- વર્ષ 2009
શ્રીલંકા સામે 51 રન – અમદાવાદ ટેસ્ટના બીજા દાવમાં
શ્રીલંકા વિરૂદ્ધ 131 રન – કાનપુર ટેસ્ટના પ્રથમ દાવમાં
શ્રીલંકા સામે 239 રન - મુંબઈ ટેસ્ટના પ્રથમ દાવમાં
બાંગ્લાદેશ સામે 52 રન – ચિતગોંગ ટેસ્ટના પ્રથમ દાવમાં
ત્રીજી વખત- વર્ષ 2010
ન્યૂઝીલેન્ડ વિરૂદ્ધ 96 રન – હૈદરાબાદ ટેસ્ટના પ્રથમ દાવમાં
ન્યૂઝીલેન્ડ સામે અણનમ 54 રન – હૈદરાબાદ ટેસ્ટના બીજા દાવમાં
ન્યૂઝીલેન્ડ વિરૂદ્ધ 74 રન – નાગપુર ટેસ્ટના પ્રથમ દાવમાં
