પોતાના શાનદાર પ્રદર્શનના કારણે ક્રિકેટના ભગવાનનુ બિરૂદ હાંસલ કરનારા માસ્ટર બ્લાસ્ટર સચિન તેંડુલકરનો જલવો શુક્રવારના રોજ મુંબઈમાં યોજાયેલા વાર્ષિક કેસ્ટ્રોલ એવોર્ડ્સમાં પણ જોવા મળ્યો હતો.
આ સમારંભમાં સચિનને ત્રણ એવોર્ડ ક્રિકેટર ઓફ ધ યર, ટેસ્ટ ક્રિકેટર ઓફ ધ યર અને એવોર્ડ ફોર સ્કોરિંગ 50 સેન્ચ્યુરી ટેસ્ટ હન્ડ્રેડથી નવાજવામાં આવ્યો હતો. ભારતીય સુકાની મહેન્દ્ર સિંહ ધોનીને વન ડે ક્રિકેટર ઓફ ધ યરનો એવોર્ડ આપવામાં આવ્યો હતો.
આ જ રીતે વિરેન્દ્ર સેહવાગને બેટ્સમેન ઓફ ધ યર અને હરભજન સિંહને બોલર ઓફ ધ યરથી સન્માનિત કરવામાં આવ્યા હતા. રાહુલ દ્રવિડને ટેસ્ટ ક્રિકેટમાં સૌથી વધુ કેચ કરવા બદલ એવોર્ડથી સન્માનિત કરવામાં આવ્યો હતો. યુસુફ પઠાણને ઈમ્પેક્ટ પ્લેયર ઓફ ધ યર અને જયદેવ ઉનડકટને જૂનિયર ક્રિકેટર ઓફ ધ યરનો એવોર્ડ આપવામાં આવ્યો હતો.
જ્યારે 1983માં ભારતને વર્લ્ડકપ જીતાડવામાં મહત્વની ભૂમિકા ભજવનારા મોહિન્દર અમરનાથને લાઈફ ટાઈમ અચિવમેન્ટ એવોર્ડથી સન્માનિત કરવામાં આવ્યા હતા. તેમને તેમના સાથી ખેલાડી સુનિલ ગાવસ્કરના હાથે આ એવોર્ડ આપવામાં આવ્યો હતો.
Prev
