- ફિલ્ડિંગમાં ધાંધિયા કરતા સુરતની ટીમે ૧૭૪ રનનો પહાડ ખડો કર્યો
અમદાવાદમાં ઇન્ટર કોર્પોરેશન ટી-૨૦ ક્રિકેટ ટુનૉમેન્ટની આજની ફાઇનલ મેચમાં રાજકોટ મેયર ઇલેવન અને સુરત મેયર ઇલેવન વચ્ચે કાંટે કી ટક્કર જેવા જંગમાં રાજકોટની ટીમને માત્ર ૩ રનનું જ છેટું રહી ગયું હતું. સુરતની ટીમે ફાંદાળા કોર્પોરેટરોએ ફિલ્ડિંગમાં કરેલા ધાંધિયાનો ભરપૂર લાભ લઇ ૧૭૪ રનનો તોતિંગ પહાડ ખડો કર્યો હતો.
રાજકોટ મેયર ઇલેવનની ટીમ શિયાળાની શરૂઆતથી જ આકરી પ્રેક્ટિસ કરતી હતી. પ્રજાના પૈસે મોંઘીદાટ કીટ ઉપરાંત મોંઘા બૂટ અને ટ્રેકશૂઝ પણ ખરીધ્યા હતા. આજે ફાઇનલ જંગ સુરત કોર્પોરેશન સામે હતો. સુરતની ટીમે ટોસ જીતીને દાવ પસંદ કર્યો હતો. સુરતની ટીમે શરૂઆતથી જ આક્રમક રમત રમી હતી. સામે રાજકોટના કોર્પોરેટરોએ અનેક કેચ છોડ્યા હતા. ફિલ્ડિંગમાં પણ હદ વગરના ધાંધિયા કર્યા હતા અને સુરતના કોર્પોરેટરોએ તેનો ભરપૂર ફાયદો ઉઠાવી ૧૭૪ રનનો તોતિંગ જુમલો ખડો કરી દીધો હતો. સુરતે માત્ર પાંચ જ વિકેટ ગુમાવી હતી. આવા તોતિંગ લક્ષ્યાંક સામે ઉતરેલી રાજકોટની ટીમે મક્કમ શરૂઆત કરી હતી. પરંતુ નિધૉરિત ૨૦ ઓવરમાં આ લક્ષ્યાંકનો પીછો કરતા કરતા ત્રણ રનનું જ છેટું રહી ગયુ હતુ.
પુષ્કર પટેલની ઝંઝાવાતી સદી એળે ગઇ -
રાજકોટ મેયર ઇલેવનના ઓપનર પુષ્કર પટેલે ઝંઝાવાતી બેટિંગ કરી હતી. મેદાન પર ચોગ્ગા-છગ્ગાનો વરસાદ વરસાવ્યો હતો. ૧૧પ રનની ઇંનિંગ રમવા છતાં ટીમને હારનો સામનો કરવો પડ્યો હતો. કશ્યપ શુક્લે પણ દમદાર ૩૨ રન કર્યા હતા. રાજકોટની ટીમ વતી બાબુ ઉધરેજાએ ૨ વિકેટ અને પુષ્કર પટેલ તથા કશ્યપ શુક્લે એક-એક વિકેટ ઝડપી હતી.
