ફરી પાણી પાણી: વિસાવદરમાં અઢી ઈંચ રાજકોટમાં ૧ ઈંચ વરસાદ

Bhaskar News, Junagadh | Sep 21, 2012, 01:11AM IST

Article

એક અઠવાડિયાથી વરસાદે વિરામ લીધા બાદ ગુરુવારે બપોરે અચાનક રાજકોટમાં ધોધમાર વરસાદ વરસી ગયો હતો. રસ્તાઓ પર ફરી પાણી ભરાઈ ગયા હતા. કન્ટ્રોલ રૂમના કહેવા મુજબ ફકત અડધી કલાકમાં ૨૩ મી.મી. એટલે કે એક ઈંચ વરસાદ પડ્યો હતો. જિલ્લામાં બપોર બાદ વાતાવરણમાં પલ્ટો આવવા સાથે ધાબડીયું હવામાન છવાઈ ગયું હતું.

મેઘરાજાએ લાંબો વિરામ લીધા બાદ વિસાવદર પથકમાં આજે બપોર બાદ મેઘરાજાએ બે થી અઢી ઈંચ વરસાદ વરસાવી દીધો હતો. સાંજનાં એક કલાકમાં અનરાધાર વરસાદ ખાબકતા મોટી મોણપરી, પ્રેમપરા, સરસઈ, ખાંભા, રામપરા સહિતનાં ગામોમાં બે થી અઢી ઈંચ પાણી પડી જતાં ખેતરો-વોંકળા જળબંબાકાર બન્યા હતા.કેશોદમાં અડધો ઈંચ જેવો વરસાદ વરસાવી દીધો હતો. જ્યારે તાલુકાનાં અજાબ, કરેણી, શેરગઢ, સહિતનાં ગામોમાં પણ જોરદાર ઝાપટાં પડ્યા હતા. તાલાલાનાં ઉમરેઠી ગામે પણ બપોર બાદ જોરદાર ઝાપટું વરસી ગયું હતું.

- જામજોધપુરના બગદરામાં દોઢ ઈંચ

જામજોધપુર તાલુકાના બગદરા ગામે પણ ગુરુવારે બપોરે દોઢ ઈંચ વરસાદ પડ્યો હતો. જ્યારે આસપાસના વિસ્તારમાં છાંટા પડ્યાના અહેવાલ છે. વાતાવરણમાં અચાનક પલટો આવ્યો હતો.