- વઢવાણમાં જીપ ડિવાઇડર પર ચઢી જતાં વીજથાંભલો ધરાશાયી
- વઢવાણ પાલિકાએ રોકડ રકમનો દંડ કર્યો
વઢવાણ-સુરેન્દ્રનગર રોડ પર દૂધની ડેરી પાસે એક જીપે પાલિકાના વીજ થાંભલાને તોડી પાડતા દોડધામ મચી ગઇ હતી. આ બનાવ અંગે પાલિકાએ પોલીસ ફરિયાદ કરવાને બદલે દંડની રકમ ભરાવીને કેસ રફેદફે કરી દીધો હતો. આ બનાવ સમયે ટ્રાફિક જામ થતા વાહનચાલકો પરેશાન બન્યા હતાં.
વઢવાણ -સુરેન્દ્રનગર રોડ પર વઢવાણ નગરપાલિકાના ૧૦૦ થી વધુ સ્ટ્રીટલાઈટો આવેલી છે. ત્યારે દૂધની ડેરી પાસે માતેલા સાંઢની જેમ આવતી જીપે કાબૂ ગૂમાવતા ડિવાઇડર પર ચડી ગઇ હતી.
ત્યારબાદ સ્ટ્રીટલાઈટનો થાંભલો તોડી પાડતા વાહનચાલકો અને મુસાફરોમાં દોડધામ મચી ગઇ હતી. આ દરમિયાન વીજ વાયર રસ્તા પર પડતા ભારે ટ્રાફિક જામ થતાં અનેક વાહનચાલકો મુશ્કેલીમાં મૂકાઇ ગયા હતાં. આ બનાવમાં વઢવાણ નગરપાલિકાએ પોલીસ ફરિયાદ કે અન્ય કાર્યવાહી ન કરતા ચકચાર ફેલાઇ છે.
આ અંગે વઢવાણ પાલિકાના લાઇટ વિભાગના કર્મીએ જણાવ્યું કે, આ બનાવમાં પાલિકાના સ્ટ્રીટના થાંભલો અને બે ટ્યૂબ સહિત ૧૦ હજારનું નુકસાન થયું છે. પરંતુ જીપ માલિકે દંડની રકમ ભરી દેતા કોઇ કાર્યવાહી કરી નથી.
