ગુજરાત રાજ્ય સરકારે આજે વિધાનસભામાં રજુ કરેલા વર્ષ-૨૦૧૧-૧૨નાં અંદાજપત્રમાં ભાવનગરથી રાજકોટ હાઈ-વેને ફોરલેન બનાવવા તેમજ કલ્પસર પ્રોજેક્ટને આગળ ધપાવવા R ૪૬.૮૨ કરોડ ફાળવાયા છે. આ ઉપરાંત બે સુવિધા શૈક્ષણિક ક્ષેત્રે ફાળવાતા આ બેજટમાં ભાવનગરની માંગને હકારાત્મક ઉકેલ મળ્યો છે.
મહત્વાકાંક્ષી કલ્પસર પ્રોજેક્ટને રાજ્ય સરકાર ધીમી પણ મક્કમ ગતિએ આગળ ધપાવી રહી છે. ભાવનગરના કાળાતળાવથી ભરૂચના અલાહર વચ્ચે ડેમ બાંધી કલ્પસર પ્રોજેક્ટને સાકાર કરવા માટે અને આ આયોજનને વધુ ઝડપી ગતિએ આગળ ધપાવવા માટે આજે બજેટમાં નાણામંત્રી વજુભાઈ વાળાએ R ૪૬.૮૨ કરોડ ફાળવ્યાની જાહેરાત કરી હતી.
ભાવનગરથી રાજકોટ વચ્ચેના ૧૫૧ કિલોમીટરના હાઈ-વે તે ચાર માર્ગીય બનાવવા માટે જોગવાઈ કરવામાં આવી છે. અત્રે ઉલ્લેખનીય છે કે, ભાવનગરથી સિહોર વચ્ચે તો ફોર-લેનની કામગીરી શરૂ પણ થઈ ગઈ છે. તેમજ ખોડિયાર મંદિર સુધી તો ચાર માર્ગીય રસ્તાનું કામ પૂર્ણ થવામાં છે.
ભાવનગર, રાજકોટ અને જામનગર ખાતેની સરકારી મેડિકલ કોલેજ તેમજ ભાવનગરની સર તખ્તસિંહજી હોસ્પિટલ (કેમ્પસ કોલેજ)નાં અપગ્રેડેશન માટે કુલ રૂ.૧૨ કરોડની ફાળવણી બજેટમાં કરાતા સરેરાશ એક મેડિકલ કોલેજને R ૪ કરોડ લેખે રકમ સુવિધા વધારવા માટે મળશે.
શિક્ષણ ક્ષેત્રે ભાવનગર જિલ્લાને મળેલી વધુ એક સુવિધામાં વલ્લભીપુરને કોલેજ મળી છે. રાજ્યમાં જે છ જિલ્લામાં નવી કોલેજ શરૂ કરવાની જાહેરાત આજના બજેટમાં કરાઈ છે. તેમાં ભાવનગર જિલ્લાના વલ્લભીપુરમાં સરકારી આર્ટસ-કોમર્સ કોલેજ શરૂ કરવાની જાહેરાત કરાઈ છે.
