આજના હાઈટ‹ક મા-બાપો પોતાના બાળકને બાળપણમાં જ બધી કળાઓમાં નિપુણ બનાવવાના કામમાં એટલા વ્યસ્ત થઈ જાય છે કે તેઓ તેમના બાળકને તેનું બાળપણ જીવવા નથી દેતા. બાળકને સ્માર્ટ’ બનાવવા પાછળ દોટ મૂકતા મા-બાપ બાળકનું હાર્ટ’ શું ઈચ્છે છે તે જોતા જ નથી. આવા આંધળુકિયા કરતા મા-બાપને એક રસ્તો ચીંધવાના પ્રયાસ રૂપે ડી.આઈ.જી હસમુખ પટેલે ત્રણ પુસ્તકો બહાર પાડ્યા છે.
‘બાળ ઘડતરની કેડી પર’, ‘બાળ ઘડતરની પ્રયોગ શાળા અને બાળ ઘડતરના અનુભવો પુસ્તકોનું ક્રોસવર્ડ ખાતે વિમોચન કરવામાં આવ્યું હતું. તેમાં તેમણે જણાવ્યું છે કે પોલીસના વરિષ્ઠ અધિકારી બનવા કરતાં પિતા બનવું વધારે અઘરું છે. બાળકના ઘડતરમાં કમ્પ્યૂટર કે ટી.વી કરતાં માતાનો ખોળો અને પિતાનો ખભો વધારે જરૂરી છે. આજે પપ્પા અને મમ્મી બિઝી છે અને બાળક ઘરમાં જ બેઘર બનીને કમ્પ્યૂટર સાથે ખાલીપો શેર કરે છે.
