દાહોદ જિલ્લામાં પગ પછાડવા છતાં બાઇક ચોરોને નાથવામાં સફળતા મળી નથી ત્યાં હાઇવે જામ કરી લૂંટ કરવા ઉપરાંત ઘરફોડ ચોરી કરતી ટોળકીઓ પુન: સક્રિય થતાં પોલીસ સાથે ‘એક સાંધે ત્યાં તેર તુટે જેવો ઘાટ’ સર્જાયો છે. જિલ્લામાં પ્રજા ભયભિત છે ત્યારે ઉપરા-છાપરી બનતા આવા બનાવોના ભેદ ઉકેલવા જુના ગુનેગારોને તપાસવામાં જ વ્યસ્ત છે પરંતુ આવા બનાવો ઉપર અંકુશ આવે તેવું કોઇ નક્કર આયોજન જોવાતું નથી.
દાહોદ જિલ્લામાં સંતોષકારક ચોમાસુ હોવા છતાં કોઇ કારણોસર પાછલા કેટલાંક સમયથી જિલ્લામાં સક્રિય થયેલી ચોર અને લૂંટારંુ ટોળકીએ લોકોની ઊંઘ હરામ કરી નાખી છે.
ટુંકા સમયના ગાળામાં ત્રણ-ત્રણ વખત હાઇવે જામ કરી વાહનો લૂંટવાની ઘટના હોય કે એકલ- દોકલ જતાં માણસોને રોકીને તેમની પાસેની જણસ સાથે વાહનો લૂંટી જવાના બનાવોમાં પોલીસ નિષ્ફળ જ રહી છે. લાગ જોઇને ઘરફોડ સાથે અન્ય ચોરી કરનારા પણ પ્રજાને ચોધાર આસુએ રડાવી રહ્યાં છે.
દાહોદ શહેરમાં રેકી બાદ બંધ ઘરોમાં ધાપ
જિલ્લા સાથે દાહોદ શહેર પણ સલામત નથી. અહીં પણ દિવસ દરમિયાન વિવિધ રૂપે રેકી કરી ગયા બાદ બંધ હોય તે ઘરને જ નિશાન બનાવવામાં આવી રહ્યા છે. શહેરમાં મંદીર સાથે દુકાનો અને રહેણાંક ઘરોમાં તસ્કરોએ કસબ અજમાવી પ્રજાની ઊંઘ ઉડાડી મુકી છે. આ બનાવો પૈકીના ગણ્યાં-ગાંઠ્યા જ પોલીસ ચોપડે ચઢેલા ગુનાઓ પણ ઉકલાયા નથી.
કોમ્બિંગ સઘન બનાવવામાં આવ્યું છે
ચોરી-લૂંટના વધતા બનાવોને જોતા જિલ્લામાં કોમ્બિંગ સઘન બનાવવામાં આવ્યું છે. આ સાથે જુના આરોપીઓને પણ તપાસવાની કામગીરી ચાલી રહી છે. ટુંક સમયમાં આ ગુનાઓ ડિટેકટ થઇ જશે તેવી શક્યતાઓ છે. નિપૂણૉ તોરવણે, ઇન્ચાર્જ એસપી, દાહોદ
