એક વર્ષથી તપાસ વિહોણી રહેલી અનાજની દુકાનોમાં ચકાસણીનો ધમધમાટ
છેલ્લા એક વર્ષથી તપાસ વિહોણી રહેલી પંચમહાલ જિલ્લાની ૨૫ સસ્તા અનાજની દુકાનોમાં અન્ય તાલુકાની ટીમોએ આકસ્મિક ચકાસણીનો ધમધમાટ આદર્યો છે. જોકે આ અંગેનો અહેવાલ તૈયાર કરવાની તજવીજ હાથ ધરાતાં ચોક્કસ માહિતી સાંપડી ન હતી. પરંતુ દુકાનદારોમાં ફફડાટ વ્યાપી ગયો છે.
છ માસ અગાઉ બોગસ લાભાર્થીઓના નામે વર્ષોથી સરકારી સામગ્રી હયગય કરાતાં દુકાનદારોની વસૂલાત પ્રકરણ ઠંડુ પડતાં પંચમહાલ પુરવઠા તંત્રમાં મહિનાઓથી કોઇ જાતનો સળવળાટ વ્યાપ્યો ન હતો.પરંતુ લાંબા સમય બાદ હવે માર્ચમાસને અનુલક્ષીને પુરવઠા તંત્રે કમર કસી છે. કલેક્ટર મનિષા ચંદ્રાના માર્ગદર્શન હેઠળ છેલ્લા એક વર્ષથી તપાસ વિહોણી રહેલી જિલ્લાની ૨૫ સસ્તા અનાજની દુકાનોમાં અન્ય તાલુકાના પ્રાંત અધિકારી, મામલતદાર સહિતની ટીમે એક દિવસીય ક્રોસ ચેકિંગ અભિયાન હાથ ધયું હતુ.
વિવિધ વિસ્તારોમાં દરોડો પાડી તપાસનો ધમધમાટ આદરતાં હિસાબ સરભર કરવાની વેતરણમાં પડ્યા હતા. દિનભર આદરેલ તપાસમાં વર્ષ દરમિયાનના રેકર્ડ, જથ્થા વિતરણ, હાજર સ્ટોક,કાર્ડધારકનો સંપર્ક કરી મેળવેલ સામગ્રીની ખાતરી કરવાની કામગીરી હાથ ધરી હતી. જેના પગલે વર્ષભર મનમાની કરીને ગેરરીતિ આચરનારા સંચાલકોમાં ભાગદોડ મચી ગઇ છે. જોકે આ અંગે પૂછતાં જિલ્લા પુરવઠા અધિકારી એસ.જે.પટેલે જણાવ્યુ હતુ કે દરેક તાલુકા કક્ષાએ અહેવાલ તૈયાર કરવાની તજવીજ ચાલુ છે.
