મહેમદાવાદ તાલુકાના માંકવા ગામમાં સુધારેલી મતદારયાદી અંગેની કોઈ જ નોટિસ મૂકવામાં આવી નોહતી, જેથી માંકવા ગામના મતદારોએ વોર્ડ નં.૨,૭ અને ૮ની ચૂંટણી મોકૂફ રાખવામાં આવે તેવી રજુઆત ચૂંટણી અધિકારીને કરી છે. મતદારયાદી માંગવા છતાં મતદારોને જુની મતદારયાદી આપવામાં આવી હતી અને નવી મતદારયાદી આપવામાં આવી નહતી. જેના કારણે મતદારો અને ઉમેદવારોએ આ અંગેનો વિરોધ કર્યો હતો.
આ અંગેની વધુ માહિતી આપતાં ઉમેદવારોએ આક્ષેપ કરતાં જણાવ્યું હતું કે ‘માંકવા ગ્રામપંચાયતની વોર્ડ નં.૨,૭ અને ૮ના મતદારોના ખોટી રીતે નામો કમી કરી અન્ય યાદીઓમાં સમાવી દીધાં છે. બીજા વોર્ડના મતદારો મતદાન કરી શકે તેમ હોય તેવા મતદારોને આ વોર્ડમાં સમાવવામાં આવ્યાં છે. ચોંકાવનારી બાબતો તો એ છે કે, મતદારયાદી શાખામાં વાંધા મંગાવતી માહિતી પણ ગ્રામપંચાયતની ઓફિસમાં મૂકવામાં આવેલ નથી. તેમજ નવી મતદારયાદી પણ આપવામાં આવી નોહતી. ફોર્મ ભરવાની તારીખ ૧૦-૧૨-૨૦૧૧થી ૧૨-૧૨-૧૧ સુધી હતી, પરંતુ ત્યાં સુધી ઉમેદવારી નોંધાવનારાંને નવી મતદારયાદી આપવામાં ન આવતાં ભારે હોબાળો થયો હતો.’
સ્થાનિક તલાટી કમ મંત્રી દ્વારા ખોટી રીતે નામોની ફેરબદલી કરી દીધાં હોવાનો આક્ષેપ પણ લોકોએ કર્યો હતો.
