માંડવીના મામલતદાર દ્વારા જમીન અંગે સતત બીજી ફરિયાદ
કચ્છમાં બોગસ દસ્તાવેજોથી જમીન કૌભાંડના કિસ્સાનું પ્રમાણ વધ્યું છે. એમાંય આવા કૌભાંડોમાં સરકારી કર્મચારીઓની સંડોવણી પણ બહાર આવતાં ગંભીરતા ઓર વધી છે. માંડવીના મામલતદારે જ આ પ્રકારની સતત બીજી ફરિયાદ નોંધાવી છે, જેમાં ગોધરા ગામના તલાટી સહમંત્રીએ સરકારી જમીનને બનાવટી રેકર્ડ ઊભો કરીને કોઈને વેચ્યાનું બહાર આવ્યું છે.
ગઢશીશાના પોલીસ સ્ટેશન ઓફિસર મોહનભાઈ મહેશ્વરીએ કહ્યું કે ૨૦૦૬માં ૮ મેના દિવસે ગોધરાના એ સમયના તલાટી કમ મંત્રી જે. કે. ગોસ્વામીએ ગામની રેવન્યુ સર્વે નંબર ૩૬૪ તથા ૩૮૧વાળી જમીન સરકારની હોવા છતાં તેના સાત-૧૨ના બોગસ ઉતારા તૈયાર કર્યા હતા, જેમાં દાતણિયા ગુલાબ રત્નાનું નામ ખેડૂત તરીકે દર્શાવ્યું હતું.
તલાટીએ જૂની શરતોને નવી શરતોમાં ફેરવીને કરેલી ગેરકાયદે કામગીરી અંગે માંડવીના મામલતદાર એન.વી. રામીએ ગુરુવારે ગઢશીશા પોલીસમાં ફરિયાદ નોંધવી હતી, આ અંગે સબ-ઈન્સ્પેકટર એમ. જે. બોક્ષાએ આરોપીની ધરપકડ માટે ચક્રો ગતિમાન કર્યા છે. ઉલ્લેખનીય છે કે બે દિવસ પહેલાં જ ચાંગડાઈ ગામમાં પણ બોગસ દસ્તાવેજથી જમીન વેચાયાની આ જ પોલીસમથકે ફરિયાદ દાખલ
થઈ હતી, એમાં પણ મૃતક વ્યક્તિના નામે ખોટું પાવરનામું તૈયાર કરીને જમીનનું વેંચાણ થયાનું બહાર આવ્યું હતું.
