બગદાદઃ વાત એક એવા રોબોટની જે ફિલ્મી નહીં પણ અસલી છે અને જેણે ઈરાકમાં અસમાન્ય કામગીરી દર્શાવીને અનેકના જીવ બચાવ્યા છે. ‘સ્કૂબી ડૂ’ નામના આ રોબોટે ઈરાક અને અફઘાનિસ્તાનમાં અનેક બોમ્બ ડિફ્યુઝ કર્યા હતા, જો કે અંતે એક બોમ્બ ડીફ્યુઝ કરવા જતા થયેલા વિસ્ફોટમાં આ રોબોટનો નાશ થયો હતો. એક મશીન હોવા છતાં પણ અમેરિકી સૈનિકોને આ રોબોટ પ્રત્યે લગાવ થયો હતો અને તેના ‘મોત’ બાદ સૈનિકોએ મૌન પાળી શોક વ્યક્ત કર્યો હતો.
આઈરોબોટ પેકબોટ ટાઈપના આ રોબોટનું વજન 60 પાઉન્ડ હતું અને તેનું મુખ્ય કામ સર્વેલન્સ તથા બોમ્બ ડિસ્પોઝલનું હતું. આ રોબોટમાં ચાર કેમેરા ફીટ કરાયેલા હતા. આ રોબોટે અત્યાર સુધીમાં 19 બોમ્બ નાકામ બનાવ્યા હતા.
ઈરાક સ્થિત અમેરિકી આર્મીના નેવી એક્સપ્લોઝીવ યુનિટ દ્વારા આ રોબોટને ઉપયોગમાં લેવામાં આવતો હતો. દરેક સફળ મિશન બાદ અમેરિકી સૈનિકો રોબોટના માનમાં સેલિબ્રેશન કરતા હતા. જો કે હાલમાં જ એક મિશનને સફળ બનાવવામાં રોબોટ નિષ્ફળ નિવડ્યો હતો તથા બોમ્બની આઈઈડી ડિવાઈસને ડિફ્યુઝ કરી શક્યો ન હતો.
હવે ‘સ્કૂબી ડૂ’ના અવશેષો અમેરિકાના મેસેચ્યુએટ્સ સ્થિત બેડફોર્ડ મ્યુઝિયમમાં રાખવામાં આવશે.
