અમેરિકી પ્રમુખ બરાક ઓબામાએ ઇરાકી શાસક સદ્દામ હુસેનના પતનનું કારણ બનેલા સાત વર્ષ જુના ‘ઓપરેશન ઇરાક ફ્રીડમ’ સમાપ્ત કરવાની જાહેરાત કરી દીધી છે. ઓપરેશન ઇરાક ફ્રીડમ સમાપ્તિ માત્ર ઇરાક નહીં પરંતુ અમેરિકાના પણ હિતમાં છે. અમેરિકાએ ઇરાકી લોકોના હાથમાં તેમના દેશનું ભવિષ્ય સોંપવા માટે ભારે કિંમત ચૂકવી છે.
અમેરિકી અર્થતંત્રને પુન: બેઠું કરવા અને પોતાની નોકરી ગુમાવી ચૂકેલા લાખો અમેરિકનોને રોજગાર આપવાની બાબત હવે અમેરિકાની ટોચની પ્રાથમિકતા છે. ઓબામાએ જણાવ્યું કે, ઇરાકમાંથી અમેરિકાએ તેના આશરે એક લાખ સૈનિકો પાછા બોલાવી લીધા છે.
રાષ્ટ્રને સંબોધતા ઓબામાએ જણાવ્યું કે, ઓપરેશન ઇરાક ફ્રીડમ સમાપ્ત થવાની સાથે હવે પોતાના દેશની સુરક્ષાની જવાબદારી ઇરાકની જનતાના ખભા પર છે. એક ડેમોક્રેટ સેનેટર તરીકે ઓબામાએ ઇરાક યુદ્ધનો વિરોધ કરીને ગત ફેબ્રુઆરીમાં ઇરાકમાંથી અમેરિકી દળોને ખસેડવા સંબંધિત યોજનાની જાહેરાત કરી હતી અને આ યોજના તેમણે અમલી બનાવી દીધી છે.
અમેરિકાએ ઇરાકમાં સેંકડો લશ્કરી મથકો બંધ કરી દીધાં છે અથવા આવા સ્થળો ઇરાકીઓને સોંપી દીધાં છે. ઓબામાએ જણાવ્યું કે, અમેરિકી લશ્કરની ટ્રાન્ઝીશનલ ટુકડી ઇરાકમાં ઉપસ્થિત રહેશે. આ ટુકડી ઇરાકી સુરક્ષા દળોને સલાહ આપશે.
