સિરિયામાં સરકારના સુરક્ષાદળો દ્વારા એક્ટિવિસ્ટસ પર કરવામાં આવેલા મોટૉર હુમલા અને તોપમારામાં શનિવારે ૨૦૦થી વધારે વ્યક્તિનાં મોત નીપજ્યાં હોવાનું એક એક્ટિવિસ્ટે જણાવ્યું હતું. છેલ્લા ૧૧ મહિનાથી અહીં શરૂ થયેલા લોકજુવાળમાં આ સૌથી વધુ લોહિયાળ ઘટના હોવાનું માનવામાં આવે છે.
સરકારે જણાવ્યું કે, હોમ્સ શહેરમાં સિરિયાનાં દળો દ્વારા હુમલા કરાયા હોવાના અહેવાલો સિરિયા વિરોધી સશસ્ત્ર સંગઠનો દ્વારા લોકોને ઉશ્કેરવા માટે ચાલી રહેલા અભિયાનના ભાગ રૂપે વહેતા કરવામાં આવ્યા છે. સિરિયામાં વધી રહેલી અરાજકતાના પગલે આ કટોકટીપૂર્ણ સ્થિતિનો મુત્સદ્દીગીરી સાથે ઉકેલ લાવવા માટેની કવાયત વધુ ઝડપી બની છે.
પરંતુ સિરિયાના મજબૂત સાથી રશિયાએ શનિવારે એવા સંકેત આપ્યા હતા કે, દેશમાં કોઈપણ રાજકીય પરિવર્તન માટેના ઠરાવનો તેઓ વિરોધ કરશે અને તેમણે પશ્ચિમી દેશો દ્વારા સમર્થિત મુસદ્દામાં પોતાના સુધારા પણ મોકલ્યા છે. વિદેશમંત્રી સેર્ગે લેવરોવે અમેરિકાને ચેતવણી આપી હતી કે રશિયાના મંતવ્ય વગર કોઈપણ ઠરાવ પર મત આપવાની કોશિશથી માત્રને માત્ર સુરક્ષા પરિષદ ખાતે ‘અન્ય કૌભાંડ’નું કારણ બની જશે.
