સૈફની તો ખબર નહીં, પણ આ સ્ટાર્સ જેલની હવા ખાઈ ચુક્યા..!

મંગળવારની રાત્રે સૈફ અલી ખાન કરિના તથા મિત્રો સાથે વસાબી જાપાનીઝ રેસ્ટોરન્ટમાં ડિનર માટે ગયો હતો. ત્યાં તેઓ ઘણાં જ જોર-જોરથી વાતો કરી રહ્યા હતા. રેસ્ટોરન્ટમાં ઈકબાલ શર્મા પોતાના પરિવાર સાથે ત્યાં ડિનર લઈ રહ્યો હતો. આ સમયે ઈકબાલે ફરિયાદના સ્વરમાં સૈફ અને તેના મિત્રોને થોડો અવાજ ઓછો કરવાનું કહ્યું હતું. આ વાતને લઈને સૈફ ભડકી ઉઠ્યો હતો. સૈફે સામો જવાબ આપ્યો હતો કે, જો શાંતિ જોઈતી હોય તો લાઈબ્રેરી જાવ અને પછી તેમની વચ્ચે ઝપાઝપી થઈ હતી. આ મુદ્દે ઈકબાલ શર્માએ કોલાબા પોલીસ સ્ટેશનમાં સૈફ અને તેના અન્ય બે સાથીઓ વિરૂદ્ધ આઈપીસી કલમ 325 હેઠળ ફરિયાદ નોંધાવી છે.

એક્ટર શાઈની આહુજાને નોકરાણી પર રેપ કરવાના કેસમાં ધરપકડ કરવામાં આવી હતી. આ ફિલ્મ ઈન્ડસ્ટ્રીની સૌથી શરમજનક ઘટના હતી. શાઈનીને રેપ કેસ હેઠળ સાત વર્ષની જેલની સજા ફરમાવવામાં આવી હતી.

બોલિવૂડના 'બેડ બોય' ગણાતા સલમાન ખાનની ચિંકારા કેસ અને રેસ ડ્રાઈવિંગ કેસમાં ધરપકડ થઈ હતી. તેણે પણ ઘણી રાતો જેલમાં વીતાવી છે. તે એક લાખ અને બે લાખ એમ બે પર્સનલ બોન્ડ પર સાઈન કરી હાલમાં જાહેરમાં ફરી શકે છે.

ફરદિન ખાન વર્ષ 2001માં ડ્રગ ડિલર પાસેથી કોકેઈન ખરીદતા પકડાયો હતો તે સમયે તેની ધરપકડ થઈ હતી.

ગેંગસ્ટર અબુસલેમની પ્રેમિકા અને મોડલ/એક્ટ્રેસ મોનિકા બેદીની પણ નકલી પાસપોર્ટના કેસમાં ધરપકડ કરવામાં આવી હતી.

જ્હોન અબ્રાહમની રેસ ડ્રાઈવિંગને કારણે એક્સિડન્ટ અને બે વ્યક્તિઓને ઈજા બદલ 2006માં ધરપકડ કરવામાં આવી હતી. તે સમયે 15 દિવસ તેને જેલમાં વીતાવવા પડ્યાં હતાં.