દમણ કોસ્ટગાર્ડના એર સ્ટેશન ખાતે બુધવારે સવારે એક ચોપર હેલિકોપ્ટર એરસ્ટેશનના હેંગરમાંથી રન વે ઉપર આવતા અચાનક આગળનું વ્હીલ તૂટી જતા એક બાજુ નમી પડ્યું હતું. હેલિકોપ્ટરમાં પાયલોટ સહિત ત્રણ વ્યક્તિ સવાર હતા. જો કે આ ઘટના ટેક ઓફના સમયે બનતા કોઇ જાનહાની થઇ નથી. દમણ કોસ્ટગાર્ડનું એક હેલિકોપ્ટર ગતરોજ વલસાડના પૂરગ્રસ્ત વિસ્તારોનું હવાઇ નિરક્ષણ માટે કાર્યરત હતું. બુધવારે પણ આ હેલિકોપ્ટર સવારે વલસાડ નિરક્ષણ માટે દમણ એર સ્ટેશનથી રવાના થઇ રહ્યું હતું.
એર સ્ટેશનના હેંગરમાંથી રન વે ઉપર લાવતા અચાનક ટેકનિકલ ખામી સજૉતા તેનું આગળનું વ્હીલ તૂટી જતા એકબાજુ નમી પડ્યું હતું. હેલિકોપ્ટરમાં પાયલોટની સાથે બીજા બે મળી કુલ ત્રણ જણા સવાર હતા. જો કે આ ઘટના ટેક ઓફના સમયે બનતા કોઇ જાનહાની થઇ ન હતી, પરંતુ ચોપરને નુકસાન થયું છે. આ ઘટના બાદ તાત્કાલિક કોસ્ટગાર્ડના આઇજી બી.એસ બસરાએ ક્ષતિગ્રસ્ત હેલિકોપ્ટરનું નિરીક્ષણ કરીને આંતરિક તપાસનો આદેશ આપ્યો હતો. આ મામલે દમણ કોસ્ટગાર્ડના પીઆરઓએ જણાવ્યું કે, ચોપરમાં કોઈ ટેકનિકલ ખામીના કારણે આ ઘટના બની છે, જેની આંતરિક તપાસના આદેશ આપી દેવાયા છે.
