દમણ અને સેલવાસમાં યુનિટ ધરાવતી કલ્પના ઈન્ડસ્ટ્રિઝ R ૨ કરોડની એક્સાઇઝ ડ્યૂટી ચૂકવવામાં નિષ્ફળ નિવડતાં એક્સાઇઝ ડિપાર્ટમેન્ટની કાર્યવાહી
દમણ અને સેલવાસમાં યુનિટ ધરાવતી કલ્પના ઈન્ડસ્ટ્રિઝના ડાયરેકટરની વાપી એક્સાઇઝ ડિપાર્ટમેન્ટ દ્વારા કરચોરી ભરપાઇ ન કરવાના કેસમાં ઘરપકડ કરાઇ છે. એક્સાઇઝ ડિપાર્ટમેન્ટે ગત અઠવાડિયા દરમિયાન કલ્પના ઈન્ડસ્ટ્રિઝમાં સર્ચ ઓપરેશન હાથ ધર્યું હતું. જેમાં તેમની કંપનીમાંથી R ૨ કરોડની કરચોરી પકડાઇ હતી. જે ચૂકવવામાં કસૂર કરતાં તેના ડાયરેકટરને એક્સાઇઝ ડિપાર્ટમેન્ટે પોતાની કસ્ટડીમાં પૂરી દીધા છે. જેના પગલે દમણ, સેલવાસ અને વાપીના ઔધ્યોગિક આલમમાં ભારે ચર્ચા ચાલી છે.
એક્સાઇઝના સૂત્રો પાસેથી મળતી વિગત મુજબ કલ્પના ઈન્ડસ્ટ્રિઝના મુંબઇ સ્થિત ડાયરેકટર રાજેશ કોઠારીની ગુરુવારે વાપી એક્સાઇઝના આસિસ્ટન્ટ કમિશનર અનુરાગ સાહેગલની ટીમે ધરપકડ કરી હતી. પ્લાસ્ટિકના દાણામાંથી પ્લાસ્ટિકની વિવિધ પેદાશો બનાવનાર કલ્પના ઈન્ડસ્ટ્રિઝમાં એક્સાઇઝ વિભાગ દ્વારા ગત અઠવાડિયા દરમિયાન સર્ચ ઓપરેશન હાથ ધરાયું હતું.
જેમાં તેમની દમણ અને સેલવાસના બંને યુનિટ મળી કુલ R ૨ કરોડની ડ્યૂટીની ચોરી પકડાઇ હતી. એક્સાઇઝ દ્વારા તેમને આ ડ્યૂટીની ચૂકવણી માટે નોટિસ પણ પાઠવી હતી, પરંતુ તેમના દ્વારા આ ડ્યૂટીની ચૂકવણીમાં કસર કરાઇ હતી. જેના પગલે એક્સાઇઝ ડિપાર્ટમેન્ટ દ્વારા તેની ધરપકડ કરવામાં આવી હતી. એક્સાઇઝ ડિપાર્ટમેન્ટને હાલ તેમના સર્ચ ઓપરેશનમાં R ૨ કરોડની એક્સાઇઝ ડ્યૂટીની ચોરી પકડાઇ છે. હાલ તેમની બંને ફેકટરીમાં સર્ચ ઓપરેશન ચાલું છે. જે દરમિયાન હજુ વધુ ડ્યૂટીની ચોરી બહાર આવવાની સંભાવના હોવાનું એક્સાઇઝના સૂત્રોએ જણાવ્યું હતું.
એક્સાઇઝના સર્ચ ઓપરેશન અને ડિરેક્ટરની ધરપકડની આ ઘટનાને પગલે દમણ સેલવાસ ઉપરાંત વાપીના ઔધ્યોગિક આલમમાં પણ ચકચાર મચી ગઇ છે.
