ઈન્ડિયન મેટિરીયોલોજીકલ વિભાગ દ્વારા જારી કરવામાં આવેલી સૂચનાને લઇ ૩૧મી ઓગસ્ટ અને ૧લી સપ્ટેમ્બરના રોજ ભારેથી અતભિારે વરસાદની સંભાવના છે. જે લક્ષમાં લઈ કોઈપણ પરિસ્થિતિમાં તમામ સ્તરે તંત્ર દ્વારા આગોતરા આયોજન અર્થે સોમવારે એક તાકીદની બેઠક કલેક્ટર ડી.પી. જોષીના અધ્યક્ષસ્થાને મળી હતી.
આ ભારેથી અતિભારે વરસાદની સંભવિત પરિસ્થિતિમાં તંત્રમાં કોઈપણ રીતે કચાશ ન રહે તે માટે અધિકારીઓને સૂચના આપી હતી. જિલ્લાના અધિકારીઓને આવશ્યક મહત્વની સૂચનાઓની અમલની કામગીરી પ્રાંત અધિકારી એમ.એસ. ગોહિલે હાથ ધરી હતી. નીચાણવાળા વિસ્તારમાં જ્યાં પાણી ભરાય છે ત્યાં આગોતરા આયોજન કરવા સંબંધિત અધિકારીઓને સૂચનાઓ અપાઈ હતી.
આ ઉપરાંત પુરવઠાની પરિસ્થિતિ, પશુપાલન, આરોગ્ય સેવા, ટેલિફોન, વીજ વગેરે સુવિધાની સમીક્ષા સાથે સૂચના અપાઈ હતી. ઉપરાંત કેશડોલ, ફૂડ પેકેટ, લાઈફ જેકેટ, હોડી, દોરડા, વાયરલેસ સેટ સહિતના સાધનો તૈયાર રાખવા સૂચના અપાઈ હતી.
બેઠકના અંતે કલેક્ટરે તમામ મુખ્ય મથકે હાજર રહેવા પણ સૂચનો આપી હતી.
પહેલીએ ૯ ઇંચ વરસાદની સંભાવના
હવામાન વિભાગ દ્વારા તાજેતરની તમામ આગાહી સંપૂર્ણત: સાચી પડી છે. આવી આગાહી અનુસાર ૩૧મીએ ૧૧૫ મિ.મિ. સરેરાશ ચારથી પાંચ ઇંચ અને અને ૧લીએ ૨૨૩ મિ.મિ. (૯ ઇંચ) વરસાદની સંભાવના છે. બેઠકમાં જુજ તથા કેલિયા ડેમ જેવા જિલ્લાના ડેમ-જળાશયોને લક્ષમાં લઈ સલામતીના પગલાં સૂચવવામાં આવ્યા હતા.
