નરેન્દ્ર મોદીના ૧૦ વર્ષના મુખ્યમંત્રીના શાસનકાળને વિકાસકામ લેખાવી ભાજપે રવિવારે નવસારીમાં વિકાસ રેલી કાઢી હતી. નરેન્દ્ર મોદીના મુખ્યમંત્રી તરીકે સમયગાળાને હાલમાં જ ૧૦ વર્ષ પૂર્ણ થયા છે. આ સમયગાળાને ભાજપ ગુજરાતના વિકાસનો સુવર્ણયુગ લેખાવી રહ્યું છે. આ ૧૦ વર્ષના સમયને વિકાસ તરીકે સાંકળી ભાજપે નવસારી શહેરમાં વિકાસકૂચનું આયોજન કર્યું હતું.
રવિવારે સવારે નવસારીના જલાલપોર વિસ્તારમાં આવેલા લીમડાચોક પાસેથી વાહનોની વિકાસ રેલીને રાજ્ય સરકારના કેબિનેટ મંત્રી મંગુભાઈ પટેલે ઝંડી આપી પ્રસ્થાન કરાવી હતી. રેલી લીમડાચોકથી જલાલપોર, ઘેલખડી, સ્ટેશન વિસ્તારથી શહેરના વિવિધ વિસ્તારોમાં ફરી નવસારી નગરપાલિકા કચેરી આવી હતી.
રેલીમાં મંગુભાઈ પટેલ ઉપરાંત જિલ્લા ભાજપ પ્રમુખ અશોક ધોરાજીયા, શહેર પ્રમુખ કરસનભાઈ ટીલવા સહિત ભાજપના મહત્તમ અગ્રણીઓ અને મોટી સંખ્યામાં કાર્યકરો જોડાયા હતા.
રેલીમાં સામેલ ભાજપી કાર્યકરોએ નરેન્દ્ર મોદીના ૧૦ વર્ષના શાસનની જયજયકાર કરી હતી. કાર્યકરોએ રેલી દરમિયાન ભાજપના શાસનમાં થયેલ વિકાસના કામો પરત્વે લોકોનું ધ્યાન દોર્યું હતું. રેલીને શહેરમાં ઠેર ઠેર ભારે આવકાર મળ્યો હતો.
