સુરત પાલિકા ટોયલેટમાં ૭ કરોડ કમાઈ !

પાલિકાએ સાત ઝોનમાં ૧૪૧ પે એન્ડ યુઝ ટોયલેટ પીપીપી ધોરણે બનાવ્યાં છે

એક વર્ષની આવક જોઈ શાસકોને પબ્લિક ટોયલેટમાં નવો સ્ત્રોત દેખાયો

હવે અત્યાધુનિક ડિઝાઇનવાળા વધુ ૨૦ ટોયલેટ બનાવવાની તજવીજ હાથ ધરી

પબ્લિક ટોયલેટમાં પીપીપી ધોરણે ‘પે એન્ડ યુઝ’નો કન્સેપ્ટ પાલિકા માટે ‘ગેઈન વિધાઉટ પે’ જેવો સાબિત થયો છે. છેલ્લાં એક જ વર્ષમાં પાલિકાને આખા શહેરમાં ૧૪૧ જેટલાં પબ્લિક ટોયલેટમાંથી ૭.૬૨ કરોડ રૂપિયા જેટલી માતબર આવક મળી છે. એટલે, હવે ભાજપ શાસકોની દાઢ સળકી છે. રૂપિયા ખર્ચ્યા વગર રૂપિયા મળે તેવી આ સેવાને હવે આવકના એક નવા વિકલ્પ તરીકે દેખાઈ ચૂકી છે. આનેલીધે નવી ડિઝાઇન સાથેના વધુ ૨૦ પબ્લિક ટોયલેટ ઊભા કરવાનો તખ્તો પણ ગોઠવી દીધો છે.

શહેરમાં પીપીપી (પબ્લિક પ્રાયવેટ પાર્ટનરશીપ) ધોરણે પબ્લિક ટોયલેટ ઊભા કરવાનો પાલિકાનો નુસ્ખો હવે કમાઉ દીકરો બની ચૂક્યો છે. ખાનગી સંસ્થાઓ પાસે બીઓટી મોડેલ (બિલ્ટ ઓપરેટ એન્ડ ટ્રાન્સફર) ઉપર છેલ્લાં ૧૦ વર્ષમાં ધીમે ધીમે પાલિકાએ કુલ ૧૪૧ જેટલાં પબ્લિક ટોયલેટ ઊભા કરી દીધાં છે. રૂપિયા ખર્ચ કર્યા વગર ઊભા કરેલાં આ શૌચાલયોમાંથી હવે મબલખ આવક મળવા માંડી છે.

પાલિકાના ટાઉન પ્લાનિંગ વિભાગનું કહેવું છે કે, શરૂઆતમાં આ મુદ્દે ખાનગી એજન્સીઓને ઓછો રસ હતો. સ્થાયી અધ્યક્ષ ભીમજી પટેલનું કહેવું હતું કે, જરૂરિયાત પણ છે અને તેમાંથી આવક મળતી હોય તો વધારે સુવિધા આપવી જોઈએ તે માટે અમે નવી ડિઝાઇન સાથેના વધુ ૨૦ જેટલાં ટોયલેટ બનાવવાની તજવીજ હાથ ધરી છે.

તસવીરો : સરજુ પારેખ,  સુરત