દારૂની કૂટેવમાં ભાઠાગામના એક યુવાને જીવ ખોવાનો વખત આવ્યો હતો. દારૂના નશામાં ભાનભૂલી ગયેલો ઈચ્છાપોર ભાઠાગામનો આ યુવાન એબીજી કંપનીના કંમ્પાઉન્ડના ગેટ સામે ઊંડા ખાડામાં પટકાઈ પડ્યો હતો. ખાડામાં પથ્થરો હોઈ માથામા ગંભીર ઈજા પહોંચતા તેનુ મોત નીપજ્યું હતુ.
બન્યુ એવું કે, ઈચ્છાપોરના ભાઠાગામના ખેડૂત ઢીમન ઠાકોરભાઈ નાયકના ખેતરમાં કામ કરતા અમરસીંગ કરમાભાઈ વસાવા (૪૦) ગત ગુરુવારના રોજ રાત્રિના ૧૦.૪૦ વાગ્યાના સુમારે ભાઠાગામની સીમમા ચાલતો જતો હતો, ત્યારે એબીજી કંપનીના કંમ્પાઉન્ડની સામે દિવાલ પાસે આંઠ ફૂટ ઉંડા ખાડામા પડી ગયો હતો. તેનુ ઘટના સ્થળે જ કરુણ મોત નીપજ્યું હતુ.
રાત્રિ દરમિયાન તેની પત્ની સુમનબેને તપાસ કરતા પતિ ખાડામા મૃત અવસ્થામાં પડ્યો મળી આવ્યો હતો. આ બનાવ અંગે ઈચ્છાપોર પોલીસને જાણ થતાં લાશના પોસ્ટમોર્ટમ અર્થે સિવિલ હોસ્પિટલ લઈ આવી હતી અને અકસ્માત મોત ગુનો દાખલ કર્યો હતો.
આ બનાવ અંગે તપાસ કરતાં ઈચ્છાપોર પોલીસ મથકના એએસઆઈ મૂળજીભાઈના જણાવ્યા મુજબ ‘ અમરસીંગ વસાવા દારૂ પીવાની ટેવવાળો હતો. તે ભાઠાગામની સીમમાંથી જતો હતો ત્યારે નશાધૂત હોઈ આંઠ ફૂટના ખાડામા પટકાઈ પડ્યો હતો. ખાડામાં પથ્થરો પણ હોઈ તેને લમણાના , કપાળ , ઘુંટણના ભાગે ગંભીર ઈજાઓ પહોંચી હતી જેથી તેનુ મોત નીપજ્યું હતુ. ’
