ડેન્જલ વોશિંગ્ટન હોલિવૂડના લોકપ્રિય સ્ટાર છે તો અમિતાભ બચ્ચન બોલિવૂડના. બંનેમાં એક વાત સમાન છે. તે એ કે તેઓ ઘર પાસે આવેલી ફાઇવ સ્ટાર હોટેલના જિમમાં નિયમિત વ્યાયામ કરે છે. અમિતાભના જુહુસ્થિત ઘરથી થોડા અંતરે જેડબ્લ્યૂ મેરિયેટ હોટેલ છે. તે રોજ સવારે ૬ વાગે જિમમાં હોય છે.
આ બંનેમાં અન્ય એક વાત સમાન છે, જેના વિશે બહુ ઓછા લોકો જાણતા હશે. તે એ કે, તેઓ જિમમાં એક્સરસાઇઝ દરમિયાન મોબાઇલ સાથે નથી રાખતા. એટલે કે, દિવસના કેટલાક કલાકો તેનાથી દૂર રહે છે. જોકે બંને સક્રિય બ્લોગર અને ટેકનો સેવી છે. આજે દરેક બાજુથી માહિતીઓનો વરસાદ થઈ રહ્યો છે. અનેક લોકોને અંગત અને વ્યવસાયી જીવન સાથે જોડાયેલા લોકો સાથે નિરંતર સંપર્કમાં રહેવાનું હોય છે. આથી સેલ ફોનનો સતત ઉપયોગ થતો રહે છે.
ખાસ કરીને બ્લેકબેરી યૂઝર્સને ફોનનો ઉપયોગ કરવામાંથી શ્વાસ લેવાનો પણ સમય નથી મળતો. કેટલાક સંપન્ન અને સફળ લોકો એવા પણ છે, જે જરૂર જેટલી જ ટેક્નિકનો ઉપયોગ કરે છે. હું જ્યારે કામથી મુસાફરી પર જાઉં છું તો મારા સહકર્મચારીઓ મને પૂછે છે કે, આખરે હું વાંચવા માટે સમય કેવી રીતે કાઢી લઉં છું. હું જ્યારે તેમને અખબારમાં છપાયેલા એકેએક સમાચાર વિશે કહું છું તો તેઓ અચંબિત થઈ જાય છે. એવું પણ નથી કે, તેઓ સવારે મોડા ઊઠે છે અને રાત્રે પાર્ટી વગેરે કરીને મોડા સૂએ છે.
તે માત્ર એક ભૂલ કરે છે અને તે એ કે, તેઓ હંમેશાં પોતાના ફોનથી ઇ-મેલ અને મેસેજ કરતાં જોવા મળે છે. તે કોઈ વીડિયો ગેમ સાથે ચીપકેલા બાળકની જેમ પોતાના ફોન સાથે ચીપકેલા હોય છે. તેઓ જમતી વખતે પણ મેસેજ અને ઇ-મેલની દુનિયામાં ખોવાયેલા રહે છે. તેમના માટે કહી શકાય કે, તેઓ ટેક્નિકની જાળમાં ફસાઈ ગયા છે. ફંડા એ છે કે, ટેક્નિક તમારી દુશ્મન બની શકે છે, કારણ એકબીજાના સંપર્કમાં રહેવાની જરૂર આપણને કંઈક વધુ અનુભવાય છે. જે લોકો આ નેટવર્કિંગની જરૂરથી દૂર રહે છે તે કામ અને અંગત જીવન વચ્ચે સારું સંતુલન કરી શકે છે. - raghu@bhaskarnet.com
