કાશ્મીરમાં હજીતો મોતનો માતમ શમ્યો નથી ત્યારે આજે ફરી કાળે કાળો કેર વર્તાવ્યો છે. શ્રીનગરના કુપવાડા જિલ્લામાં આજે સવારે હિમપ્રપાત થયો હતો. જેમાં સેનાના એક જવાનનું મોત નિપજ્યું હતું. આ પહેલા સોમવારે બનેલી એક ઘટનામાં 17 જવાનોના મોત થયા હતાં.

સુરક્ષા અધિકારીએ જણાવ્યું કે હિમપ્રપાતની ઘટનાથી અત્રે 145 કિલોમીટર દૂર આવેલ તંગધારમાં સવારે લગભગ પોણા ચાર વાગ્યે બનેલ આ ઘટનામાં 14 સૈનિકો ફસાઈ ગયા હતાં. તેમણે જણાવ્યું કે બધા જ 14 જવાનોને બરફમાંથી બહાર કાઢી લેવામાં આવ્યા હતાં. પરંતુ બાદમાં તેમાંથી એક સૈનિકનું મોત નિપજ્યું હતું.

આ પહેલા સોમવારે ગુલમર્ગનો સ્કાય રિસોર્ટ હિમપ્રપાતનો ભોગ બન્યો હતો. જેમાં 17 સૈનિકો મોતને ભેટ્યા હતાં. જ્યારે 17 જવાનો ગંભીર રીતે ઘાયલ થયા હતાં. આ ઘટના ત્યારે ઘટી હતી જ્યારે આ જવાનો અત્રે ટ્રેઈનીંગ લઈ રહ્યા હતાં.

સેના પ્રવક્તાએ જણાવ્યું કે ગુલમર્ગમાં હવામાન પ્રતિકૂળ હોવાથી અને સતત ભારે હિમવર્ષા થવાના કારણે આ ઘટના ઘટી હતી.